ലോകത്ത് ഏറ്റവും കൂടുതല്‍ ആരാധകര്‍ ഉള്ള സൂപ്പര്‍ ഹീറോ സിനിമകള്‍ ഒരുക്കിയ മാര്‍വലിന്റെ ഏറ്റവും പുതിയ ചിത്രമായ ബ്ലാക്ക് വിഡോയുടെ റിലീസ് തീയതി പുറത്തുവിട്ടു.
ചിത്രം നവംബര്‍ ആറിന് പ്രദര്‍രശനത്തിന് എത്തും. മാര്‍വല്‍ കോമിക്‌സിലെ ഇതേ പേരിലുള്ള കഥാപാത്രത്തെയാണ് അവര്‍ സ്‌ക്രീനില്‍ എത്തിക്കുന്നത്. സിവില്‍ വാര്‍, ഇന്‍ഫിനിറ്റി വാര്‍, എന്‍ഡ് ഗെയിം എന്നീ സിനിമകളിലൂടെ ആരാധകരെ ആകര്‍ഷിച്ച ബ്ലാക്ക് വിഡോയെ കേന്ദ്ര കഥാപാത്രമാക്കി സിനിമ വരുമ്പോള്‍ ആരാധകര്‍ഏറെ ആവേശത്തിലാണ്.
ഈ ചിത്രം സംവിധാനം ചെയ്യുന്നത് കേറ്റ് ഷോര്‍ട്ട്‌ലാന്റ്‌ ആണ് . ജാക്ക് ഷാഫറും നെഡ് ബെന്‍സണും ചേര്‍ന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. സ്‌കാര്‍ലറ്റ് ജോഹാന്‍സണ്‍ ആണ് ചിത്രത്തില്‍ ബ്ലാക്ക് വിഡോ ആയി വേഷമിടുന്നത്. ഡേവിഡ് ഹാര്‍ബര്‍, ഫ്‌ലോറന്‍സ് പഗ്, ഫാഗെന്‍, റേച്ചല്‍ വീസ് എന്നിവരാണ് ചിത്രത്തിലെ മറ്റ് താരങ്ങള്‍.
2016ല്‍ പുറത്തിറങ്ങിയ ക്യാപ്റ്റന്‍ അമേരിക്ക സിവില്‍ വാര്‍ എന്ന ചിത്രത്തിലെ കഥയ്ക്ക് ശേഷം നടക്കുന്ന സംഭവങ്ങളാണ് ഈ ചിത്രം പറയുന്നത്.
