മുബൈ: ബോളിവുഡ് താരം സല്‍മാന്‍ ഖാനും പിതാവ് സലിം ഖാനും വധഭീഷണി. ഭീഷണി കത്ത് ലഭിച്ചതിനെ തുടര്‍ന്ന് ബോളിവുഡ് താരത്തിന്റെ സുരക്ഷ വര്‍ധിപ്പിച്ചു. ഞായറാഴ്ചയാണ് അജ്ഞാത ഭീഷണി കത്ത് ലഭിച്ചത്. സലിംഖാന്‍ ദിവസവും നടക്കാന്‍ പോകാറുള്ള ബാന്ദ്രയിലെ പ്രൊമെനേഡില്‍ നിന്നാണ് കത്ത് കണ്ടെത്തിയത്. കൊല്ലപ്പെട്ട പഞ്ചാബി ഗായകന്‍ സിദ്ദു മൂസെ വാലയുടെ അനുഭവം ഉണ്ടാവുമെന്ന പരാമര്‍ശം ഭീഷണി കത്തിലുണ്ടെന്നാണ് റിപ്പോര്‍ട്ട്.
നടത്തം കഴിഞ്ഞ് സലിം ഖാൻ വിശ്രമിക്കാറുള്ള ബെഞ്ചില്‍ നിന്ന് സുരക്ഷാ ഉദ്യോഗസ്ഥരാണ് ഭീഷണിക്കത്ത് ആദ്യം കണ്ടത്. എഫ്‌.ഐ.ആര്‍ രജിസ്റ്റര്‍ ചെയ്ത് പോലീസ് അന്വേഷണം ആരംഭിച്ചു. പ്രദേശത്തെ സി.സി.ടി.വികളുടെ പരിശോധനയിലാണ് പൊലീസ്.
മെയ് 29ന് പഞ്ചാബിലെ മാന്‍സയില്‍ വെച്ചാണ് സിദ്ദു മൂസെ വാല വെടിയെറ്റ് മരിച്ചത്. പഞ്ചാബ് സര്‍ക്കാര്‍ അദ്ദേഹത്തിന്റെ സുരക്ഷ പിന്‍വലിച്ചതിന് തൊട്ടുപിന്നാലെയായിരുന്നു കൊലപാതകം. കുപ്രസിദ്ധ ലോറന്‍സ് ബിഷ്‌ണോയി സംഘത്തിന് സംഭവത്തില്‍ പങ്കുണ്ടെന്നാണ് പൊലീസ് സംശയിക്കുന്നത്. 2018ല്‍ കൃഷ്ണമൃഗത്തെ വേട്ടയാടിയ കേസില്‍ ഇതേ സംഘം സല്‍മാന്‍ ഖാനെ ഭീഷണിപ്പെടുത്തിയിരുന്നു.
