മുംബൈ: ഭാരത് പെട്രോളിയം കോർപറേഷൻ ലിമിറ്റഡിന്റെ (ബി.പി.സി.എൽ) സർക്കാറിനുള്ള 52.98 ശതമാനം ഓഹരി മുഴുവനായി വാങ്ങുന്നതിന് മൂന്നു സ്വകാര്യ കമ്പനികളിൽ നിന്ന് ലഭിച്ച താൽപര്യപത്രങ്ങൾ (ഇഒഐ) പെട്രോളിയം മന്ത്രാലയത്തിന്റെ ഉന്നതതല സമിതി ഇന്ന് വിലയിരുത്തും. വേദാന്ത ഗ്രൂപ്പ്, അന്താരാഷ്ട്ര ഇക്വിറ്റി ഫണ്ടുകളായ അപ്പോളോ ഗ്ലോബൽ, ഐ സ്ക്വയേർഡ് ക്യാപ്പിറ്റലിന് കീഴിലുളള തിങ്ക് ഗ്യാസ് എന്നീ കമ്പനികളാണ് താൽപര്യപത്രം സമർപ്പിച്ചിട്ടുളളത്.
കമ്പനിയുടെ ഓഹരി വിൽപ്പനയുടെ ട്രാൻസാക്ഷൻ അഡ്വൈസറായി നിയോഗിക്കപ്പെട്ട ഡിലോയിറ്റ് ഇഒഐകളെക്കുറിച്ച് സമർപ്പിച്ച പരിശോധനാ റിപ്പോർട്ടും സമിതി വിലയിരുത്തും. കഴിഞ്ഞയാഴ്ച കേന്ദ്ര മന്ത്രിതല സമിതിയും താൽപര്യപത്രങ്ങൾ പരിശോധിച്ചിരുന്നു.
