ഒട്ടാവ: കാനഡയിൽ മുസ്ലീം കുടുംബത്തെ കാറിടിപ്പിച്ചു കൊലപ്പെടുത്തിയ കേസിലെ പ്രതിയ്ക്കെതിരെ തീവ്രവാദക്കേസ് ചുമത്തി. അറ്റോര്‍ണി ജനറലിൻ്റെ അനുമതി കിട്ടിയതോടെയാണ് കേസിലെ പ്രതിയായ നഥാനിയേൽ വെൽറ്റ്മാൻ എന്ന 20കാരനെതിരെ തീവ്രവാദക്കുറ്റം ചുമത്തിയത്. നടന്നത് തീവ്രവാദ ആക്രമണമാണെന്നാണ് പ്രധാനമന്ത്രി ജസ്റ്റിൻ ട്രൂഡോയും സംഭവത്തെ വിശേഷിപ്പിച്ചത്.
ജൂൺ ആറിനാണ് കാനഡയിലെ ഒൻ്റാറിയോ പ്രവിശ്യയിൽ മുസ്ലീം കുടുംബത്തിലെ നാലു പേര്‍ കാറിടിച്ചു കൊല്ലപ്പെട്ടത്. പ്രതി ഇവരെ ലക്ഷ്യമിട്ട് മനഃപൂര്‍വം വാഹനമിടിപ്പിക്കുകയായിരുന്നുവെന്നാണ് അധികൃതര്‍ വ്യക്തമാക്കുന്നത്. ഇയാള്‍ക്കെതിരെ മുൻകൂട്ടി തയ്യാറെടുത്ത് കൊലപാതകം നടത്തിയതിനും കൊലപാതക ശ്രമം നടത്തിയതിനും കേസെടുത്തിരുന്നു. ഇതിനു പുറമെയാണ് തീവ്രവാദക്കുറ്റം ചുമത്തിയിരിക്കുന്നത്.
