കോട്ടയം: പ്രണയവിവാഹത്തെത്തുടര്‍ന്ന് ഭാര്യാവീട്ടുകാര്‍ തട്ടിക്കൊണ്ടുപോയി കൊലപ്പെടുത്തിയ കെവിന്‍ ജോസഫിന്റെ കൊലപാതകവുമായി ബന്ധപ്പെട്ട് മൂന്ന് പേര്‍ കൂടി പിടിയില്‍. നിഷാദ്, ഷെഫിന്‍, ടിറ്റോ ജെറോം എന്നിവരാണ് പിടിയിലായത്.
കേസുമായി ബന്ധപ്പെട്ട് രണ്ട് പൊലീസുകാരും കസ്റ്റഡിയിലായിരുന്നു. പൊലീസുകാര്‍ പ്രതികളെ സഹായിച്ചുവെന്ന് ഐജി വ്യക്തമാക്കിയിരുന്നു. കേസിലെ പ്രധാന പ്രതികള്‍ കെവിന്റെ ഭാര്യ നീനുവിന്റെ സഹോദരന്‍ ഷാനു ചാക്കോയും, പിതാവ് ചാക്കോയുമാണ്. ഇവര്‍ ഇന്നലെ ഇരിട്ടി കരിക്കോട്ടക്കരി പൊലീസ് സ്റ്റേഷനില്‍ കീഴങ്ങിയിരുന്നു.
ഗൂഢാലോചന കേസില്‍ നീനുവിന്റെ മാതാവ് രഹനയെയും പ്രതിചേര്‍ക്കും. എന്നാല്‍ ഇവര്‍ ഇപ്പോള്‍ ഒളിവിലാണ്. കേസിലെ ഒന്നാം പ്രതിയാണ് ഷാനു ചാക്കോ. ഷാനുവാണ് തട്ടിക്കൊണ്ടുപോകല്‍ ആസൂത്രണം ചെയ്തതും നടപ്പിലാക്കിയതും. ഗൂഢാലോനക്കുറ്റമാണ് ചാക്കോയ്‌ക്കെതിരെ ചുമത്താന്‍ പൊലീസ് ഉദ്ദേശിക്കുന്നത്.
കെവിന്റെ പോസ്റ്റ്‌മോര്‍ട്ടം റിപ്പോര്‍ട്ടിന്റെ കൂടുതല്‍ വിവരങ്ങള്‍ ഇന്നാണ് ലഭിക്കുന്നത്. മുങ്ങിമരണമാണെന്നാണ് പ്രാഥമിക നിഗമനം. മര്‍ദ്ദിച്ചവശനാക്കിയ ശേഷം വെള്ളത്തില്‍ മുക്കിക്കൊന്നതായിക്കാം എന്നാണ് പൊലീസിന്റെ നിഗമനം. തന്റെ മാതാപിതാക്കളുടെ അറിവോടെയാണ് കെവിനെ കൊലപ്പെടുത്തിയതെന്ന് നേരത്തെ നീനുവും വ്യക്തമാക്കിയിരുന്നു. ഇതിന് പിന്നാലെയാണ് ചാക്കോയെയും ഭാര്യ രഹനയേയും കേസില്‍ പ്രതി ചേര്‍ത്തത്. മൊത്തം 16 പ്രതികള്‍ ഉണ്ടെന്നാണ് പൊലീസിന്റെ കണ്ടെത്തല്‍.
