തിരുവനന്തപുരം : അടുത്ത വര്‍ഷം മുതല്‍ ഗെയിംസിനങ്ങള്‍ കൂടി ഉള്‍പ്പെടുത്തി സെന്‍ട്രല്‍ സ്‌കൂള്‍ കായികമേള വിപുലമാക്കുമെന്ന് മുഖ്യമന്ത്രി പിണറായി വിജയന്‍.
സി.ബി.എസ്.ഇ, നവോദയ, കേന്ദ്രീയ വിദ്യാലയ, ഐ.സി.എസ്.ഇ വിദ്യാര്‍ത്ഥികളുടെ കായിക മേള ചന്ദ്രശേഖരന്‍ നായര്‍ സ്റ്റേഡിയത്തില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സംസ്ഥാനത്തിന്റെ കായിക രംഗത്തെ അഭിമാന നിമിഷമാണിത്. ഈ മേള സുപ്രധാനമായ ഒരു ചുവടുവയ്പാണ്. കേന്ദ്ര സിലബസ് പഠിക്കുന്ന വിദ്യാര്‍ത്ഥികള്‍ക്കായി കായിക മേള സംഘടിപ്പിക്കുന്നത് രാജ്യത്തുതന്നെ ഇതാദ്യമാണെന്നും അദ്ദേഹം പറഞ്ഞു.
കായിക ഭൂപടത്തില്‍ നിന്ന് മാറ്റി നിര്‍ത്തിയ ഒരു വിഭാഗത്തെ കളിക്കളത്തില്‍ ഒപ്പം നിര്‍ത്താനും കായികൗന്നത്യത്തിലേക്ക് കൈപിടിച്ചുയര്‍ത്താനുമാണ് ഇന്ത്യയിലാദ്യമായി സംസ്ഥാനത്ത് സെന്‍ട്രല്‍ സ്‌കൂള്‍ മേള സംഘടിപ്പിക്കുന്നത്. പല കാര്യങ്ങളിലും രാജ്യത്തിനു മാതൃകയായ നമ്മുടെ സംസ്ഥാനം ഇക്കാര്യത്തിലും മറ്റു സംസ്ഥാനങ്ങള്‍ക്ക് മാതൃകയായിരിക്കുകയാണെന്നും മുഖ്യമന്ത്രി കൂട്ടിച്ചേര്‍ത്തു.
