സെഞ്ചൂറിയന്‍: സെഞ്ചൂറിയന്‍ ടെസ്റ്റില്‍ ഇന്ത്യയ്‌ക്കെതിരെ ദക്ഷിണാഫ്രിക്കയ്ക്ക് 28 റണ്‍സിന്റെ ലീഡ്. ഇന്ത്യ 307 റണ്‍സിന് പുറത്തായി. ഒറ്റയാള്‍ പോരാട്ടം നടത്തി 153 റണ്‍സ് നേടിയ കൊഹ്‌ലി ഏറ്റവും ഒടുവിലായാണു പുറത്തായത്.
ഏഴാം വിക്കറ്റില്‍ രവിചന്ദ്രന്‍ അശ്വിനൊപ്പം കൊഹ്‌ലി കൂട്ടിച്ചേര്‍ത്ത 71 റണ്‍സാണ് ഇന്ത്യയെ മത്സരത്തിലേക്കു തിരിച്ചെത്തിച്ചത്. 46 റണ്‍സ് നേടിയ ഓപ്പണ്‍ മുരളി വിജയാണ് ഇന്ത്യന്‍ നിരയില്‍ തിളങ്ങിയ മറ്റൊരു ബാറ്റ്‌സ്മാന്‍. ആതിഥേയര്‍ക്കായി മോണ്‍ മോര്‍ക്കല്‍ നാലു വിക്കറ്റ് നേടി.
നേരത്തെ, ടെസ്റ്റിലെ തന്റെ 21-ാം സെഞ്ചുറിയാണ് സെഞ്ചൂറിയാനില്‍ കൊഹ്‌ലി കുറിച്ചത്. 146 പന്തിലായിരുന്നു നായകന്റെ ശതകവേട്ട. 130 പന്തില്‍ 85 റണ്‍സുമായി രണ്ടാം ദിനം അവസാനിപ്പിച്ച കൊഹ്‌ലി അനായാസം സെഞ്ചുറിയിലേക്കെത്തി.
എന്നാല്‍ കൊഹ്‌ലിയുടെ സെഞ്ചുറി നേട്ടത്തിന്റെ ആഹ്ലാദം അടങ്ങും മുന്നെ ഒരറ്റത്ത് നിലയുറപ്പിച്ചിരുന്ന പാണ്ഡ്യയുടെ വിക്കറ്റ് ഇന്ത്യയ്ക്ക് നഷ്ടമായി. അനാവശ്യമായി റണ്‍സിനായി ക്രീസ് വിട്ടിറങ്ങി ഓടിയ പാണ്ഡ്യ തിരികെ കയറാനുള്ള ശ്രമത്തിനിടെയാണ് ഔട്ടായത്. തുടര്‍ന്നായിരുന്നു അശ്വിനൊപ്പമുള്ള നായകന്റെ കൂട്ടുകെട്ട്. അശ്വിന്‍ 38 റണ്‍സ് നേടി പുറത്തായി.
