എറണാകുളം: കോളേജ് വിദ്യാര്‍ത്ഥികള്‍ക്കിടയില്‍ കഞ്ചാവ് വില്‍പന നടത്തി വന്നിരുന്ന യുവാവ് പിടിയില്‍. കറുകടം സ്വദേശി അനന്തു ബി നായരാണ് പിടിയിലായത്. ഇയാളുടെ വീട്ടില്‍ നിന്നും ഒന്നേകാല്‍ കിലോ കഞ്ചാവ് പൊലീസ് പിടിച്ചെടുത്തു.ക്ലാസ് കട്ട് ചെയ്ത് കഞ്ചാവ് വലിക്കുന്ന ഏതാനും കോളേജ് വിദ്യാര്‍ത്ഥികളെ കഴിഞ്ഞ ദിവസങ്ങളില്‍ പൊലീസ് കസ്റ്റഡിയിലെടുത്തിരുന്നു. ഇവരെ ചോദ്യം ചെയ്തതില്‍ നിന്ന് കിട്ടിയ സൂചനകളിലൂടെയാണ് കറുകടം സ്വദേശി അനന്തുവിനെ പൊലീസ് പിടികൂടുന്നത്.
മാതിരപ്പിള്ളി ഭാഗത്ത് വീട് വാടകയ്‌ക്കെടുത്തായിരുന്നു കഞ്ചാവ് കച്ചവടം. കോതമംഗലം സിഐ യൂനസ്, എസ്.ഐ ദിലീഷ് എന്നിവരടങ്ങുന്ന പൊലീസ് സംഘം പ്രതിയുടെ താമസസ്ഥലത്ത് നടത്തിയ പരിശോധനയില്‍ ബാഗിനുള്ളില്‍ ഒളിപ്പിച്ചിരുന്ന ഒന്നേകാല്‍ കിലോ കഞ്ചാവും പിടിച്ചെടുത്തു.
