ദേശീയ ഗുസ്തി ഫെഡറേഷൻ അഡ് ഹോക്ക് കമ്മിറ്റി ഇന്ത്യൻ ഒളിംപിക് അസോസിയേഷൻ പിരിച്ചുവിട്ടു. ഇതോടെ ദേശീയ ഫെഡറേഷൻ പഴയതു പോലെ ഭരണപരമായ എല്ലാ അധികാരവുമായി പ്രവർത്തിക്കും. അടുത്ത മാസം നടക്കാനിരിക്കുന്ന ഒളിംപിക് യോഗ്യാത ഇവന്റിനുള്ള സെലക്ഷൻ ട്രയൽസ് വിജയകരമായി പൂർത്തിയാക്കിയതിനാലാണ് അഡ് ഹോക്ക് കമ്മിറ്റിയെ പിരിച്ചുവിട്ടതെന്നു ഐഒഎ വ്യക്തമാക്കി.
ലോക ഗുസ്തി ബോ‍ഡിയായ യുനൈറ്റഡ് വേൾഡ് റസ്ലിങ് ഡബ്ല്യുഎഫ്ഐയുടെ വിലക്ക് നീക്കിയതോടെ സെലക്ഷൻ ട്രയൽസ് സുഗമമായി നടത്താൻ സാധിച്ചിരുന്നു. അഡ് ഹോക്ക് കമ്മിറ്റിയുടെ കീഴിൽ ഇനിയും ഫെഡറേഷൻ പ്രവർത്തിക്കേണ്ടതില്ലെന്നാണ് ഇന്ത്യൻ ഒളിംപിക് അസോസിയേഷൻ വിലയിരുത്തുന്നത്. ഇതോടെ ഡബ്ല്യുഎഫ്ഐ അതിന്റെ പതിവ് ഭരണഘടനയ്ക്ക് കീഴിൽ പ്രവർത്തിക്കും.
നേരത്തെ കായിക മന്ത്രാലയമാണു ഡബ്ല്യുഎഫ്ഐയെ സസ്പെൻഡ് ചെയ്തത്. പിന്നാലെ ഡിസംബറിൽ അഡ്ഹോക്ക് കമ്മിറ്റി രൂപികരിക്കുകയായിരുന്നു.
