ന്യൂഡല്‍ഹി: കോണ്‍ഗ്രസിന്റെ പാര്‍ലമെന്ററി നയരൂപീകരണ സമിതി യോഗം ഇന്ന് നടക്കും. പൗരത്വ നിയമ ഭേദഗതിയില്‍ പ്രതിഷേധം തുടരുന്ന പശ്ചാത്തലത്തില്‍ വരുന്ന പാര്‍ലമെന്റ് സമ്മേളനത്തില്‍ സ്വീകരിക്കേണ്ട നയങ്ങള്‍ യോഗം ചര്‍ച്ച ചെയ്യും.
സോണിയ ഗാന്ധിയുടെ വസതിയില്‍ വൈകുന്നേരം അഞ്ച് മണിക്കാണ് യോഗം. ഇതോടൊപ്പം രാഷ്ട്രപതിയുടെ നയപ്രഖ്യാപന പ്രസംഗം ബഹിഷ്‌ക്കരിച്ചേക്കുമെന്ന സൂചനയ്ക്കിടെയാണ് യോഗം ചേരുന്നത്.
രാജ്യത്തിന്റെ 71 ാം റിപ്പബ്ലിക് ദിനത്തില്‍ ഭരണഘടനയുടെ മൂല്യം കേന്ദ്രസര്‍ക്കാരിനെ ഓര്‍മ്മിപ്പിക്കുന്ന തരത്തിലുള്ള പ്രതിഷേധം രാജ്യമാകെ അരങ്ങേറിയിരുന്നു. അതിനിടെ ട്വിറ്ററിലൂടെ കോണ്‍ഗ്രസ് വ്യത്യസ്തമായ പ്രതിഷേധം അറിയിച്ച് രംഗത്തെത്തി.
പ്രധാനമന്ത്രി നരേന്ദ്ര മോദിക്ക് ഇന്ത്യന്‍ ഭരണഘടനയുടെ പകര്‍പ്പ് അയച്ചുകൊടുത്താണ് കോണ്‍ഗ്രസ് പ്രതിഷേധിച്ചത്. ഔദ്യോഗിക ട്വിറ്ററര്‍ പേജിലൂടെ രാജ്യത്തെ ഭിന്നിപ്പിക്കുന്നതിനിടയില്‍ സമയം കിട്ടുമ്പോള്‍ ഇതൊന്നു വായിച്ച് നോക്കണമെന്നും കോണ്‍ഗ്രസ് കുറിച്ചിട്ടുണ്ട്.
