കോപ അമേരിക്ക ടൂര്‍ണമെന്റിന്റെ ക്വാര്‍ട്ടറില്‍ കടന്ന് ചിലി. ഇക്വഡോറിനെ ഒന്നിനെതിരെ രണ്ട് ഗോളുകള്‍ക്ക് പരാജയപ്പെടുത്തിയാണ് നിലവിലെ ചാമ്പ്യന്മാര്‍ കൂടിയായ ചിലി മുന്നേറിയത്.
കളി തുടങ്ങി എട്ടാം മിനിറ്റില്‍ ചിലി ആദ്യ വെടി പൊട്ടിച്ചു. പെഡ്രോ ഫ്യുവന്‍സാലിഡയായിരുന്നു ഗോള്‍ സ്‌കോറര്‍. എന്നാല്‍ ചിലിയുടെ ഗോള്‍ ലീഡ് അധിക നേരം നീണ്ടുനിന്നില്ല. ഇരുപത്തിയാറാം മിനുറ്റില്‍ പെനാല്‍റ്റിയില്‍ നിന്ന് വല കുലുക്കി വലന്‍സിയ മത്സരത്തില്‍ ഇക്വഡോറിനെ ഒപ്പമെത്തിച്ചു. ആദ്യ പകുതി കഴിയുമ്പോള്‍ സ്‌കോര്‍ 1-1 ആയിരുന്നു.
രണ്ടാംപകുതി ആരംഭിച്ച് ആറാം മിനുറ്റില്‍ സൂപ്പര്‍ താരം സാഞ്ചസ് നേടിയ ഗോള്‍ മത്സരത്തില്‍ ചിലി യുടെ വിജയം ഉറപ്പിക്കുന്നതായിരുന്നു. പിന്നീട് ഇരു ടീമുകളും നടത്തിയ ഗോള്‍ ശ്രമങ്ങളെല്ലാം വിഫലമായതോടെ ചിലി 2-1 ന്റെ വിജയത്തോടെ ക്വാര്‍ട്ടറിലേക്ക് മുന്നേറുകയായിരുന്നു.
