റിയാദ്: കൊവിഡിനെ പ്രതിരോധിക്കാന്‍ റമദാന്‍ ആരംഭിച്ചതിന് ശേഷം മക്കയിലെ ഗ്രാന്‍ഡ് മോസ്‌ക് ശുദ്ധിയാക്കാന്‍ ഉപയോഗിച്ചത് 70,000 ലിറ്റര്‍ അണുനാശിനി. വിശ്വാസികളെ വൈറസില്‍ നിന്നും സംരക്ഷിക്കാനായി രാജ്യത്ത് വിപുലമായ ശുചീകരണ പ്രവര്‍ത്തനങ്ങള്‍ ഒരുക്കിയതായി കണക്കുകള്‍ വ്യക്തമാക്കുന്നു.
തീര്‍ഥാടകരുടെ സുരക്ഷ ഉറപ്പുവരുത്തുന്നതിനായി കര്‍ശന നടപടികള്‍ ഗ്രാന്‍ഡ് മോസ്‌കിന്റെയും പ്രവാചക പള്ളിയുടെയും ജനറല്‍ പ്രസിഡന്‍സി അവതരിപ്പിച്ചു. സാമൂഹിക അകലം പാലിക്കുക, മാസ്‌ക് ധരിക്കുക, സഞ്ചരിക്കേണ്ട ഇടങ്ങള്‍, സാനിറ്റൈസേഷന്‍ സ്റ്റേഷനുകള്‍, വാക്സിന്‍ സ്വീകരിച്ചവര്‍ക്ക് മാത്രം പ്രവേശനം തുടങ്ങിയ നടപടി ക്രമങ്ങള്‍ ഇതില്‍ ഉള്‍പ്പെടുന്നു.
അണുനാശിനികളോടൊപ്പം എല്ലാദിവസവും 1,500 ലിറ്റര്‍ സാനിറ്റൈസിംഗ് പെര്‍ഫ്യൂമുകളും ഗ്രാന്‍ഡ് മോസ്‌കില്‍ ഉപയോഗിക്കുന്നു. പള്ളിയില്‍ 3,000 ചവറ്റുകുട്ടകള്‍ വിതരണം ചെയ്യുന്നും പള്ളിയിലെ ഓരോ സ്‌ക്വയറുകളും ഒരു ദിവസം 10 തവണ കഴുകുന്നതും ഉള്‍പ്പെടെയുള്ള ആരോഗ്യ മുന്‍കരുതലുകള്‍ പാലിക്കുന്നുണ്ട്.
