കൊച്ചി: ജില്ലാ സെക്രട്ടറി പി.എൻ. മോഹനനുമായി ഉണ്ടായ തർക്കത്തെത്തുടർന്ന് സി.പി.എം. എറണാകുളം ജില്ലാ ഓഫീസ് സെക്രട്ടറിയെ മാറ്റി. ജില്ലാ കമ്മിറ്റി അംഗം ചന്ദ്രശേഖരനേയാണ് ഓഫീസ് സെക്രട്ടറി സ്ഥാനത്തുനിന്ന് നീക്കിയത്. എൻ.ജി.ഒ. യൂണിയൻ മുൻ സംസ്ഥാന നേതാവ് എൻ. കൃഷ്ണപ്രസാദിനാണ് പകരം ചുമതല.
ഓഫീസ് കാര്യങ്ങളുമായി ബന്ധപ്പെട്ട് നേരത്തെ തന്നെ ഇരുവരും തർക്കത്തിലായിരുന്നുവെന്നാണ് റിപ്പോർട്ട്. മാസങ്ങൾക്ക് മുമ്പ് ചില ചുമതലകളിൽ നിന്ന് ചന്ദ്രശേഖരനെ ഒഴിവാക്കിയിരുന്നു. കഴിഞ്ഞ ദിവസം ചേർന്ന ജില്ലാ കമ്മിറ്റി യോഗത്തിലും വിഷയം സജീവ ചർച്ചയാകുകയും ഇതുമായി ബന്ധപ്പെട്ട് ജില്ലാ കമ്മിറ്റിയിൽ തർക്കങ്ങൾ ഉണ്ടാകുകയും ചെയ്തെന്നും റിപ്പോർട്ടുണ്ട്.
