തിരുവനന്തപുരം: സിപിഎം പോളിറ്റ് ബ്യൂറോ അംഗം പിണറായി വിജയനെ മുഖ്യമന്ത്രിയാക്കാന്‍ തീരുമാനം.
സിപിഐഎം വിളിച്ചു ചേര്‍ത്ത സെക്രട്ടറിയേറ്റ് യോഗത്തിലാണ് ഇതു സംബന്ധിച്ച തീരുമാനമായത്. അല്‍പസമയത്തിനകം ചേരുന്ന സംസ്ഥാനസമിതി യോഗത്തിന് ശേഷം തീരുമാനം വാര്‍ത്താകുറിപ്പായി അറിയിക്കുമെന്നാണ് വിവരം.
ജനറല്‍ സെക്രട്ടറി സീതാറാം യെച്ചൂരിയും പോളിറ്റ്ബ്യൂറോ അംഗം പ്രകാശ് കാരാട്ടും പങ്കടുത്ത യോഗത്തിലാണ് പിണറായിയെ മുഖ്യമന്ത്രിയായി തെരഞ്ഞെടുക്കാന്‍ തീരുമാനമായത്.പാര്‍ട്ടി തീരുമാനം വിഎസ് അംഗീകരിച്ചു.
സര്‍ക്കാര്‍ രൂപീകരിക്കാനുള്ള ഭൂരിപക്ഷം കിട്ടിയ സാഹചര്യത്തില്‍ സംസ്ഥാനത്തെ മുഖ്യമന്ത്രിയെ തീരുമാനിക്കാനുള്ള നിര്‍ണ്ണായക യോഗമാണ് ചേര്‍ന്നത്. സിപിഐഎമ്മിനെ സംബന്ധിച്ച് ഏറ്റവും നിര്‍ണ്ണായക യോഗമാണ് നടന്നത്.
വിഎസും, പിണറായിയും ഒരുമിച്ച് മത്സരിച്ച സാഹചര്യത്തില്‍ ആരു മുഖ്യമന്ത്രിയാകും എന്ന ചോദ്യം ഉയര്‍ന്നിരുന്നു. ഇതിനാണ് ഇപ്പോള്‍ വ്യക്തമായ ഉത്തരം കിട്ടിയിരിക്കുന്നത്. ഭൂരിപക്ഷ പിന്തുണയുള്ള പിണറായിയെ മുഖ്യമന്ത്രി സ്ഥാനത്തേക്ക് തെരഞ്ഞെടുക്കുമ്പോള്‍ വിഎസിന് അര്‍ഹിച്ച സ്ഥാനം നല്‍കുമെന്നും റിപ്പോര്‍ട്ടുകളുണ്ട്.
