മുംബൈ: ബോളിവുഡ് താരം നിധി അഗര്‍വാളിനൊപ്പം ഇന്ത്യന്‍ ക്രിക്കറ്റ് താരം കെ.എല്‍.രാഹുല്‍. ഇരുവരുടെയും ചിത്രങ്ങള്‍ വൈറലായി മാറിയിരിക്കുകയാണ് ഇപ്പോള്‍. ഇരുവരും മുംബൈയിലെ ഭക്ഷണശാലയില്‍ നിന്ന് ഇറങ്ങി വരുന്നതിന്റെ ചിത്രങ്ങളാണ് ഇപ്പോള്‍ പുറത്ത് വന്നിരിക്കുന്നത്.
ഐ.പി.എല്ലില്‍ മികച്ച പ്രകടനം കാഴ്ചവെച്ച രാഹുല്‍ ടൂര്‍ണ്ണമെന്റിന് ശേഷമാണ് നിധി അഗര്‍വാളിനൊപ്പം പ്രത്യക്ഷപ്പെട്ടത്. ജൂണില്‍ അഫ്ഗാനിസ്ഥാനുമായി നടക്കുന്ന ടെസ്റ്റ് മത്സരത്തിനുള്ള ഇന്ത്യന്‍ ടീമില്‍ രാഹുല്‍ ഇടംപിടിച്ചിട്ടുണ്ട്.
ഐ.പി.എല്ലില്‍ പതിനൊന്നാം സീസണില്‍ 14 മത്സരങ്ങളില്‍ നിന്നായി 54.91 ശരാശരിയില്‍ 659 റണ്‍സായിരുന്നു രാഹുലിന്റെ സമ്പാദ്യം. ഡല്‍ഹിക്കെതിരെ 14 പന്തില്‍ നിന്ന് 51 റണ്‍സ് നേടി ഐ.പി.എല്ലിലെ ഏറ്റവും വേഗതയാര്‍ന്ന് അര്‍ദ്ധശതകം നേടിയ റെക്കോര്‍ഡും രാഹുല്‍ ഈ സീസണില്‍ കുറിച്ചിട്ടുണ്ട്.
ഗോസിപ്പ് കോളങ്ങളിലെ നിറസാന്നിധ്യമാണ് രാഹുല്‍. വിവിധ താരസുന്ദരികളുമായുളള രാഹുലിന്റെ ഫോട്ടോകള്‍ ഇടയ്ക്കിടെ സോഷ്യല്‍ മീഡിയയില്‍ പ്രചരിക്കാറുണ്ട്. നടിമാരുമായി രാഹുലിന്റെ ബന്ധങ്ങളെ കുറിച്ച് പാപ്പരാസികള്‍ പല റൂമറുകളും അടിച്ചിറക്കാറും ഉണ്ട്.
