വിനീത് ശ്രീനിവാസന്‍ സംവിധാനം ചെയ്യുന്നാണ് പുതിയ ചിത്രം ഹൃദയത്തിലെ ദര്‍ശന എന്ന ഗാനം സോഷ്യല്‍ മീഡിയയില്‍ വൈറലാണ്. റിലീസ് ചെയ്ത് അഞ്ച് ദിവസങ്ങള്‍ പിന്നിടുമ്പോള്‍ 75 ലക്ഷം കാഴ്ചക്കാരിലേക്ക് അടുത്തുകൊണ്ടിരിക്കുകയാണ്. ഇപ്പോഴിതാ സിനിമയെക്കുറിച്ച് മറ്റൊരു അപ്‌ഡേറ്റ് എത്തിയിരിക്കുകയാണ്. സിനിമയിലെ ഗാനങ്ങള്‍ കാസറ്റ് രൂപേണ പുറത്തിറക്കുമെന്ന് അദ്ദേഹം നേരത്തെ അറിയിച്ചിരുന്നു.
ഇപ്പോഴിതാ ഓഡിയോ കാസറ്റുകളുടെ സാംപിള്‍ ജപ്പാനില്‍ നിന്ന് എത്തിയ സന്തോഷം പങ്കുവച്ചിരിക്കുകയാണ് വിനീത്. എത്തിയ കാസറ്റുകള്‍ പരിശോധിച്ച് നിര്‍മ്മാതാക്കള്‍ക്ക് അയച്ചു കൊടുത്തു എന്ന് അദ്ദേഹം പറഞ്ഞു. കാസറ്റുകളുടെ പ്രീ-ഓര്‍ഡര്‍ ഉടന്‍ ആരംഭിക്കും. ഇന്ത്യയില്‍ ഒരു പതിറ്റാണ്ടിനുശേഷമാണ് ഇങ്ങനെ ഒന്ന് നടക്കുന്നത്. ഒരുപാട് നാളായുണ്ടായിരുന്ന സ്വപ്‌നമാണ് നടക്കാന്‍ പോകുന്നത്’, വിനീത് തന്റെ സന്തോഷം പങ്കുവെച്ചു.
പ്രണവ് മോഹന്‍ലാലിന്റെ മൂന്നാമത്തെ ചിത്രമാണ് ഹൃദയം. ചിത്രത്തില്‍ കല്ല്യാണി പ്രിയദര്‍ശന്‍, ദര്‍ശന രാജേന്ദ്രന്‍ എന്നിവരും കേന്ദ്ര കഥാപാത്രങ്ങളാണ്. 15 ഗാനങ്ങളുള്ള സിനിമയുടെ സംഗീത സംവിധാനം നിര്‍വഹിക്കുന്നത് ഹിഷാം അബ്ദുള്‍ വഹാബ് ആണ്. മെറിലാന്‍ഡ് സിനിമാസിന്റെ ബാനറില്‍ വിശാഖ് സുബ്രഹ്‌മണ്യമാണ് ചിത്രം നിര്‍മ്മിക്കുന്നത്. ഛായാഗ്രഹണം വിശ്വജിത്ത് ഒടുക്കത്തില്‍. എഡിറ്റിംഗ് രഞ്ജന്‍ എബ്രഹാം.
