ഡല്‍ഹി: ഐ.എസ്.എല്‍ മത്സര ക്രമത്തെ രൂക്ഷമായിവിമര്‍ശിച്ച് കേരള ബ്ലാസ്റ്റേഴ്സ് പരിശീലകന്‍ ഡേവിഡ് ജെയിംസ്. ഐ.എസ്.എല്ലില്‍ കേരളത്തിന്റെ തുടര്‍ച്ചയായ മൂന്നാമത്തെ എവേ മത്സരമായിരുന്നു ജംഷഡ്പൂരിനെതിരെ നടന്നതെന്നും, ഞായറാഴ്ച മുംബൈയില്‍ കളിച്ച കേരള ബ്ലാസ്റ്റേഴ്സ് കൂടുതല്‍ വിശ്രമം ലഭിക്കാതെയാണ് ഇന്നലത്തെ മത്സരത്തിന് ഇറങ്ങിയതെന്നും ഡേവിഡ് ജെയിംസ് ചൂണ്ടിക്കാട്ടി.
ലീഗില്‍ മൂന്ന് ടീമുകള്‍ 9 മത്സരങ്ങള്‍ മാത്രം കളിച്ചപ്പോള്‍ കേരള ബ്ലാസ്റ്റേഴ്സ് 11 മത്സരങ്ങള്‍ കളിച്ചത് എങ്ങനെയെന്ന് മനസ്സിലായില്ല എന്നും ഡേവിഡ് ജെയിംസ് പറഞ്ഞു.
അതേസമയം ജംഷഡ്പൂരിനെതിരെ പരാജയപ്പെട്ടത് മത്സരത്തിന്റെ ആദ്യ മിനിറ്റുകളില്‍ തന്നെ ഗോള്‍ വഴങ്ങി തിരിച്ചടിയായതിനാലാണെന്നും ജെയിംസ് വ്യക്തമാക്കി. മത്സരത്തിന്റെ 22-ാമത്തെ സെക്കന്‍ഡില്‍ ജെറിയുടെ ഗോളില്‍ കേരളം ലീഡ് വഴങ്ങിയിരുന്നു. തുടര്‍ന്ന് ആദ്യ പകുതിയില്‍ തന്നെ രണ്ടാമത്തെ ഗോളും വഴങ്ങിയ കേരള ബ്ലാസ്റ്റേഴ്സ് ഇഞ്ചുറി ടൈമില്‍ സിഫ്‌നിയോസ് ഒരു ഗോള്‍ മടക്കിയെങ്കിലും പരാജയപ്പെടുകയായിരുന്നു.
