ജക്കാര്‍ത്ത: ഇന്തോനേഷ്യയില്‍188 യാത്രക്കാരുമായി കടലില്‍ തകര്‍ന്നുവീണ വിമാനത്തിന്റെ പൈലറ്റ് ഇന്ത്യക്കാരനെന്ന് റിപ്പോര്‍ട്ട്. ഡല്‍ഹി സ്വദേശി ഭവ്യേ സുനേജയാണ് വിമാനം പറത്തിയത്. ഡല്‍ഹി മയൂര്‍ വിഹാര്‍ സ്വദേശിയാണ് ഭവ്യേ.
2011 മാര്‍ച്ചിലാണ് സുനേജ ലണ്‍ എയറില്‍ ചേര്‍ന്നത്. ഡല്‍ഹിയിലേക്ക് ട്രാന്‍സ്ഫര്‍ അനുവദിക്കണമെന്ന് സുനേജ ആവശ്യപ്പെട്ടിരുന്നതായി ലയണ്‍ എയര്‍ വൃത്തങ്ങള്‍ അറിയിച്ചു. ഏറ്റവും കൃത്യതയോടെ ജോലി ചെയ്തിരുന്ന വ്യക്തിയായിരുന്നു സുനേജ എന്നും കമ്പനി അറിയിച്ചു.
ജക്കാര്‍ത്തയില്‍ നിന്ന് ബങ്കാ ദ്വീപിലെ പങ്കാല്‍ പിനാങ്കിലേക്ക് പോയ ലയണ്‍ എയറിന്റെ ജെ.ടി 610 വിമാനമാണ് പറന്നുയര്‍ന്ന് 13 മിനിട്ടുകള്‍ക്ക് ശേഷം തകര്‍ന്ന് വീണത്. പ്രാദേശിക സമയം തിങ്കളാഴ്ച രാവിലെ 6.20 ന് പറന്നുയര്‍ന്ന വിമാനവുമായി 6.33 നാണ് അവസാനം ആശയവിനിമയം നടന്നത്. ബോയിംഗ് 737 മാക്‌സ് 8 വിമാനമാണ് അപകടത്തില്‍പ്പെട്ടത്.
