തമിഴിലെ യുവ സൂപ്പര്‍ സ്റ്റാറാണ് ധനുഷ്. താരത്തിന്റെ പുതിയ ചിത്രത്തില്‍ നായികയായെത്തുന്നത് മലയാളിതാരം രജിഷ വിജയനാണ്. പരിയേറും പെരുമാള്‍ എന്ന ചിത്രത്തിലൂടെ ശ്രദ്ധേയനായ സംവിധായകന്‍ മാരി സെല്‍വരാജാണ് ചിത്രം സംവിധാനം ചെയ്യുന്നത്. എന്നാല്‍ ചിത്രത്തിനെക്കുറിച്ച് ഔദ്യോഗിക സ്ഥിരീകരണമൊന്നും പുറത്തുവിട്ടിട്ടില്ല. വി.ക്രിയേഷന്‍സിന്റെ ബാനറില്‍ കലൈപുലി എസ്. താണുവാണ് ചിത്രം നിര്‍മ്മിക്കുന്നത്.
അതേ സമയം ധനുഷും മഞ്ജു വാര്യരും ഒന്നിക്കുന്ന അസുരന്‍ ഒക്ടോബര്‍ 4 ന് തിയേറ്ററുകളിലെത്തും. കാര്‍ത്തിക് സുബരാജ് സംവിധാനം ചെയ്യുന്ന ചിത്രത്തിന്റെ ചിത്രീകരണവുമായി ബന്ധപ്പെട്ട് ധനുഷ് ഇപ്പോള്‍ ലണ്ടനിലാണ്. മലയാളി താരം ഐശ്വര്യ ലക്ഷ്മിയാണ് നായിക. ഇതുവരെ ചിത്രത്തിന് പേരിട്ടിട്ടില്ല. ഉലകം ചുറ്റം വാലിബന്‍ എന്ന പേര് പരിഗണനയിലുണ്ട്.1973-ല്‍ ഇതേ പേരില്‍ ഒരു എം.ജി.ആര്‍ ചിത്രം പുറത്തിറങ്ങിയിട്ടുണ്ട്. ഗൗതം മേനോന്‍ സംവിധാനം ചെയ്യുന്ന എന്നൈ നോക്കി പായും തോട്ടയാണ് ഉടന്‍ തിയേറ്ററുകളിലെത്തുന്ന മറ്റൊരു ധനുഷ് ചിത്രം.
