ബെംഗളൂരു: കര്‍ണാടക കോണ്‍ഗ്രസ് അധ്യക്ഷന്‍ ഡി.കെ ശിവകുമാറിന്റെ മകള്‍ ഐശ്വര്യ ശിവകുമാര്‍ വിവാഹിതയാകുന്നു. അന്തരിച്ച കഫേ കോഫി ഡെ സ്ഥാപകന്‍ സിദ്ധാര്‍ത്ഥയുടെ മകന്‍ അമര്‍ത്യയാണ് വരന്‍. എഞ്ചിനീയറിങ്ങ് ബിരുദധാരിയായ ഐശ്വര്യ ഡി.കെ സ്ഥാപിച്ച ഗ്ലോബല്‍ അക്കാദമി ഓഫ് എഞ്ചിനീയറിങ്ങിന്റെ ഭരണച്ചുമതല നിര്‍വ്വഹിക്കുകയാണ്.
അതേസമയം, അമേരിക്കയില്‍ ഉപരിപഠനം പൂര്‍ത്തിയാക്കിയ അമര്‍ത്യ പിതാവിന്റെ മരണ ശേഷം അമ്മ മാളവികയ്ക്ക് ഒപ്പം കുടുംബ ബിസിനസ് നടത്തുകയാണ്. കര്‍ണാടക മുന്‍ മുഖ്യമന്ത്രിയായ എസ്എം കൃഷ്ണയുമായുള്ള ദീര്‍ഘകാല ബന്ധം പേരക്കുട്ടിക്ക് മകളെ വിവാഹം ചെയ്തു കൊടുത്തുകൊണ്ട് ഒന്നുകൂടി ഉറപ്പിക്കുകയാണ് ഡി.കെ ശിവകുമാര്‍.
കൃഷ്ണയുടെ മരുമകനായ സിദ്ധാര്‍ത്ഥയുമായും ഡി.കെ ശിവകുമാറിന് അടുത്ത ബന്ധമുണ്ടായിരുന്നു. സിദ്ധാര്‍ത്ഥയുടെ മരണത്തിന് മുമ്പ് തന്നെ വിവാഹം ഉറപ്പിച്ചിരുന്നുവെന്നും അപ്രതീക്ഷിതമായ വിയോഗത്തില്‍ വിവാഹം മാറ്റിവയ്ക്കുകയായിരുന്നുവെന്നും സിദ്ധാര്‍ത്ഥ മരിച്ച് ഒരുവര്‍ഷം പിന്നിടുമ്പോള്‍ ഇരു കുടുംബങ്ങളും വിവാഹം നടത്താന്‍ തീരുമാനിക്കുകയായിരുന്നുവെന്നും ശിവകുമാര്‍ വ്യക്തമാക്കി.
കഴിഞ്ഞ ഞായറാഴ്ച ഇരുകുടുംബങ്ങളും ശിവകുമാറിന്റെ വീട്ടില്‍ വെച്ച് വിവാഹ നിശ്ചയത്തിന്റെ തിയതി തീരുമാനിച്ചു. ഓഗസ്റ്റില്‍ വിവാഹ നിശ്ചയം നടക്കുമെന്നാണ് റിപ്പോര്‍ട്ടുകള്‍. കഴിഞ്ഞ വര്‍ഷം ജൂലൈ 31നാണ് സിദ്ധാര്‍ത്ഥ ആത്മഹത്യ ചെയ്തത്.
