ദുല്‍ഖര്‍ സല്‍മാന്‍ നായകനാകുന്ന പുതിയ ചിത്രം ‘കുറുപ്പി’ന്റെ ചിത്രീകരണം തുടങ്ങി. ചിത്രത്തില്‍ സുകുമാരക്കുറുപ്പായാണ് ദുല്‍ഖര്‍ വേഷമിടുന്നത്. ചിത്രീകരണത്തിന് മുന്നോടിയായുള്ള പൂജയുടെ വീഡിയോ അണിയറ പ്രവര്‍ത്തകര്‍ പുറത്തുവിട്ടിട്ടുണ്ട്. ‘സെക്കന്‍ഡ് ഷോ’യിലൂടെ ദുല്‍ഖറിനെ സിനിമയില്‍ അവതരിപ്പിച്ച ശ്രീനാഥ് രാജേന്ദ്രനാണ് ചിത്രം സംവിധാനം ചെയ്യുന്നത്.
ഒരു വര്‍ഷം മുമ്പാണ് ശ്രീനാഥ് സുകുമാരക്കുറുപ്പിനെ കുറിച്ചുള്ള സിനിമ പ്രഖ്യാപിക്കുന്നത്. കൂടെ ഫാന്‍ മെയ്ഡ് പോസ്റ്ററും പങ്കുവെച്ചിരുന്നു. അന്നത് വൈറലായിരുന്നു.
ദുല്‍ഖര്‍ നിര്‍മിക്കുന്ന രണ്ടാമത്തെ ചിത്രം കൂടിയാണ് കുറുപ്പ്. നേരത്തെ ജേക്കബ്‌ ഗ്രിഗറി നായകനാകുന്ന അശോകന്റെ ആദ്യ രാത്രി എന്ന ചിത്രവും ദുല്‍ഖര്‍ പ്രഖ്യാപിച്ചിരുന്നു. ഇന്ദ്രജിത് സുകുമാരന്‍, സണ്ണി വെയ്ന്‍, ഷൈന്‍ ടോം ചാക്കോ തുടങ്ങിയവരും ചിത്രത്തില്‍ പ്രധാന വേഷത്തിലെത്തുന്നുണ്ട്.
നിമിഷ് രവി ഛായാഗ്രഹണം ഒരുക്കുന്ന ചിത്രത്തിന്റെ സംഗീതം നിര്‍വഹിക്കുന്നത് സുഷിന്‍ ശ്യാം ആണ്. ദേശീയ പുരസ്‌കാര ജേതാവ് വിനേഷ് ബംഗ്ലാനാണ് കലാസംവിധാനം നിര്‍വഹിക്കുന്നത്.
