കൈമുട്ടിലേറ്റ പരുക്ക് കാരണം ജോഫ്ര ആർച്ചർ ഇന്ത്യക്കെതിരായ ടി-20 പരമ്പരയിൽ കളിച്ചേക്കില്ല.പരുക്ക് മൂലം ഇന്ത്യക്കെതിരായ അവസാന ടെസ്റ്റ് മത്സരത്തിലും ആർച്ചർ കളിച്ചിരുന്നില്ല. ഇംഗ്ലണ്ട് ക്രിക്കറ്റ് ബോർഡ് മെഡിക്കൽ ടീം ആർച്ചറെ നിരീക്ഷിച്ചുകൊണ്ടിരിക്കുകയാണെന്ന് പരിശീലകൻ ക്രിസ് സിൽവർവുഡ് പറഞ്ഞു.
“ജോഫ്രയുടെ കൈമുട്ടിന് ചെറിയ ഒരു പ്രശ്നമുണ്ട്. അത് മെഡിക്കൽ സംഘം നിരീക്ഷിക്കുന്നുണ്ട്. ഇന്ന് അദ്ദേഹം പരിമിത ഓവർ മത്സരങ്ങൾക്കുള്ള ടീമിനൊപ്പം പരിശീലനം നടത്തി. മെഡിക്കൽ സംഘം എന്നെ കാര്യങ്ങൾ അറിയിക്കും.”ക്രിസ് സിൽവർവുഡ് പറഞ്ഞു.
ടെസ്റ്റ് പരമ്പര ഇന്ത്യ 3-1ന് സ്വന്തമാക്കിയിരുന്നു. ആദ്യ മത്സരം പരാജയപ്പെട്ടിട്ടാണ് ഇന്ത്യ ഉജ്ജ്വലമായി തിരികെ എത്തിയത്. അവസാന മത്സരത്തിൽ ഇന്നിംഗ്സിനും 25 റൺസിനുമാണ് ഇന്ത്യ വിജയിച്ചത്. ആദ്യ ഇന്നിംഗ്സിൽ 205 റൺസിന് ഓളൗട്ടായ ഇംഗ്ലണ്ട് രണ്ടാം ഇന്നിംഗ്സിൽ 135 റൺസിന് ഓളൗട്ടായി. ഇന്ത്യ ആദ്യ ഇന്നിംഗ്സിൽ 365 റൺസാണ് എടുത്തത്.
