ധരംശാല: ഇന്ത്യക്കെതിരായ അഞ്ചാം ടെസ്റ്റില്‍ ഇംഗ്ലണ്ടിന് ബാറ്റിങ് തകര്‍ച്ച. രണ്ടാം സെഷനില്‍ പിരിയുമ്പോള്‍ 55 ഓവറില്‍ 194 റണ്‍സിനിടെ എട്ട് വിക്കറ്റുകളാണ് ഇംഗ്ലണ്ടിന് നഷ്ടമായത്. അഞ്ചുവിക്കറ്റ് നേട്ടം കൊയ്ത കുല്‍ദീപ് യാദവാണ് ഇന്ത്യന്‍ ബൗളര്‍മാരില്‍ മികച്ച പ്രകടനം നടത്തിയത്. ഇംഗ്ലണ്ടിനായി ഓപ്പണര്‍ സാക് ക്രൗലി 79 റണ്‍സെടുത്തു. അശ്വിന് രണ്ടും ജഡേജയ്ക്കും ഒന്നും വിക്കറ്റുകള്‍.ടോസ് നേടി ബാറ്റിങ് തിരഞ്ഞെടുത്ത ഇംഗ്ലണ്ട് കരുതലോടെയാണ് ആരംഭിച്ചത്. ഒരു ഘട്ടത്തില്‍ ഒരു വിക്കറ്റ് മാത്രം നഷ്ടത്തില്‍ 100 റണ്‍സ് എന്ന നിലയിലായിരുന്നു ഇംഗ്ലണ്ട്. പിന്നീട് 83 റണ്‍സ് ചേര്‍ക്കുന്നതിനിടെ ഏഴ് വിക്കറ്റുകള്‍ കളഞ്ഞു.ടീം സ്‌കോര്‍ 64-ല്‍ നില്‍ക്കേയാണ് ഇംഗ്ലണ്ടിന് ആദ്യ വിക്കറ്റ് നഷ്ടമായത്. കുല്‍ദീപ് യാദവിന്റെ പന്തില്‍ ശുഭ്മാന്‍ ഗില്ലിന് ക്യാച്ച് നല്‍കി ബെന്‍ ഡക്കറ്റ് ആദ്യം മടങ്ങി (27 റണ്‍സ്). 100 റണ്‍സില്‍ നില്‍ക്കേ, ഒലീ പോപ്പിനെയും (11) കുല്‍ദീപ് മടക്കി. വിക്കറ്റ് കീപ്പര്‍ ധ്രുവ് ജുറേലിനാണ് ക്യാച്ച് ലഭിച്ചത്. അപ്പോഴും ഒരറ്റത്ത് സാക് ക്രൗളി പിടിച്ചുനിന്ന് സ്‌കോര്‍ ഉയര്‍ത്തി.
ഹിമാചല്‍പ്രദേശിലെ ധരംശാല സ്റ്റേഡിയത്തിലാണ് മത്സരം. പരമ്പര നേരത്തേ 3-1ന് സ്വന്തമാക്കിയ ഇന്ത്യ ആധിപത്യം ഉറപ്പിക്കാനാണ് ഇറങ്ങുക. ഇന്ത്യക്കുവേണ്ടി ദേവ്ദത്ത് പടിക്കല്‍ അരങ്ങേറ്റം കുറിച്ചു. രജത് പാട്ടിദറിനു പകരക്കാരനായാണ് ദേവ്ദത്തിനെ ടീമില്‍ ഉള്‍പ്പെടുത്തിയത്. ആകാശ് ദീപിന് പകരമായി ജസ്പ്രീത് ബുംറയെയും ഉള്‍പ്പെടുത്തി. ഇംഗ്ലണ്ട് നിരയില്‍ ഒലീ റോബിന്‍സനു പകരം മാര്‍ക്ക് വുഡ് തിരിച്ചെത്തുന്നു എന്ന ഏക മാറ്റമാണുള്ളത്.രവിചന്ദ്രന്‍ അശ്വിന്റെ നൂറാം ടെസ്റ്റാണിതെന്ന പ്രത്യേകത കൂടിയുണ്ട് ഇന്ത്യക്ക്. ഇംഗ്ലണ്ട് താരം ജോണി ബെയര്‍സ്റ്റോയ്ക്കും ഇത് നൂറാം ടെസ്റ്റാണ്. രണ്ടുപേരുടെയും നൂറാം ടെസ്റ്റ് കളറാക്കുക എന്നതായിരിക്കും ഇരുടീമുകളുടെയും ലക്ഷ്യം.
ക്യാപ്റ്റന്‍ ബെന്‍ സ്റ്റോക്സിനെ പൂജ്യത്തിന് മടക്കി കുല്‍ദീപ് വീണ്ടും തിരിച്ചെത്തി. എല്‍.ബി.ഡബ്ല്യൂ. ആയിരുന്നു. കുല്‍ദീപിന്റെ അഞ്ചാം വിക്കറ്റ്. ടീം സ്‌കോര്‍ 183-ല്‍ നില്‍ക്കേ, ടോം ഹാര്‍ട്ടിലിയെയും (ആറ്) മാര്‍ക്ക് വുഡിനെയും (പൂജ്യം) രവിചന്ദ്രന്‍ അശ്വിന് മടക്കി. വിക്കറ്റ് കീപ്പര്‍ ബെന്‍ ഫോക്സും (5) ഷൊഐബ് ബഷീറും (4) ആണ് ക്രീസില്‍.മൂന്നാമതായാണ് സാക് ക്രൗളി മടങ്ങിയത്. ഇത്തവണയും പന്തെറിഞ്ഞത് കുല്‍ദീപ്. ഇതോടെ കുല്‍ദീപിന് ഹാട്രിക്. 108 പന്തുകള്‍ നേരിട്ട് 79 റണ്‍സ് നേടി ഇംഗ്ലണ്ടിന്റെ ടോപ് സ്‌കോററാണ് ക്രൗളി. നാലാമതെത്തിയ ജോണി ബെയര്‍സ്റ്റോയെയും കുല്‍ദീപ് തന്നെയാണ് മടക്കിയത്. ഇത്തവണയും ക്യാച്ച് ധ്രുവ് ജുറേലിന്. തന്റെ 100-ാം ടെസ്റ്റ് മത്സരത്തില്‍ ബാറ്റേന്തിയ ബെയര്‍സ്റ്റോ തകര്‍പ്പനടികളോടെ തുടങ്ങിയെങ്കിലും വലിയ തുടര്‍ച്ചയുണ്ടായില്ല. 18 പന്തില്‍ 29 റണ്‍സെടുത്തു മടങ്ങി. ജോ റൂട്ടിനെ വിക്കറ്റിനു മുന്നില്‍ കുരുക്കി രവീന്ദ്ര ജഡേജയും വേട്ടയ്ക്ക് തുടക്കമിട്ടു. 26 റണ്‍സാണ് റൂട്ടിന്റെ സമ്പാദ്യം.
