ലണ്ടന്‍: ഇംഗ്ലീഷ് പ്രീമിയർ ലീഗ് സീസണ് ഇന്ന് തുടക്കമാവും. ആഴ്സണൽ രാത്രി പന്ത്രണ്ടരയ്ക്ക് തുടങ്ങുന്ന മത്സരത്തിൽ ക്രിസ്റ്റൽ പാലസിനെ നേരിടും. ക്രിസ്റ്റൽ പാലസിന്‍റെ തട്ടകത്തിലാണ് മത്സരം. ആഴ്സണൽ ക്രിസ്റ്റൽ പാലസിനെതിരെ പന്തുതട്ടുമ്പോൾ പുതിയ ചാമ്പ്യൻമാർക്ക് വേണ്ടിയുള്ള യാത്രയ്ക്ക് തുടക്കമാകും. കഴിഞ്ഞ സീസണിൽ ആഴ്സണൽ അ‍ഞ്ചും ക്രിസ്റ്റൽ പാലസ് പന്ത്രണ്ടും സ്ഥാനത്തായിരുന്നു.
എല്ലാ കിരീടങ്ങൾക്കും പൊരുതാൻ ശേഷിയുള്ള സംഘവുമായാണ് മികേൽ അർട്ടേറ്റ ഇത്തവണ ആഴ്സണലുമായി എത്തുന്നത്. ഗബ്രിയേൽ ജെസ്യൂസ്, ഒലക്സാണ്ടർ സിൻചെൻകോ, ഫാബിയോ വിയേര, മാറ്റർ ടർണർ, മാർക്വീഞ്ഞോസ് എന്നിവരാണ് ഇത്തവണ ടീമിലെത്തിയ പ്രമുഖർ. ഷാക്ക, മാർട്ടിനല്ലി, സാക, ഒഡേഗാർഡ് തുടങ്ങിയവർ കൂടി ചേരുമ്പോൾ ആഴ്സണൽ എതിരാളികൾക്ക് വെല്ലുവിളിയാവും.
ആഴ്സണലിന്‍റെ എക്കാലത്തേയും മികച്ച താരങ്ങളിൽ ഒരാളായ പാട്രിക് വിയേരയുടെ ശിക്ഷണത്തിലാണ് ക്രിസ്റ്റൽ പാലസ് ഇറങ്ങുന്നത്. പ്രീമിയർ ലീഗിൽ ഇരുടീമും ഏറ്റുമുട്ടിയത് 26 കളിയിൽ. ആഴ്സണൽ പതിനാലിൽ ജയിച്ചപ്പോൾ ക്രിസ്റ്റൽ പാലസിന് ജയിക്കാനായത് നാല് കളിയിൽ മാത്രം.
