ഫുൾ ചാർജാകാൻ 10 മിനിറ്റ്, റേഞ്ച് 200 കിലോമീറ്റർ വരെ ലഭിക്കുന്ന ഇലക്ട്രിക് കാറുമായി ഡൽഹി ആസ്ഥാനമായി പ്രവർത്തിക്കുന്ന ഇന്ത്യന്‍ സ്റ്റാര്‍ട്ട് ആപ് സംരംഭം ഹൃമാന്‍ മോട്ടോർസ്. ‘ആർ ടി 90’ എന്ന പേരിൽ എത്തുന്ന വൈദ്യുത കാറിൽ ഫോർ ജി കണക്റ്റഡ് ഐ ഒ ടി പ്ലാറ്റ്ഫോമും നിർമ്മാതാക്കൾ വാഗ്ദാനം ചെയ്യുന്നു.
കാറിലെ ബാറ്ററി ചാർജ് ചെയ്യാൻ ഫാസ്റ്റ് ഡി സി ചാർജറിൽ 10 മിനിറ്റ് മതി, സാധാരണ എ സി ചാർജറിലാവട്ടെ ഒന്നു മുതൽ രണ്ടു വരെ മണിക്കൂറും. ഒറ്റത്തവണ ചാർജ് ചെയ്താൽ 200 കിലോമീറ്റർ വരെ ഓടാൻ കാറിനാവുമെന്നും ഹൃമാൻ മോട്ടോഴ്സ് അവകാശപ്പെടുന്നു.
നിലവിൽ പരീക്ഷണ ഘട്ടത്തിലുള്ള ആര്‍.ടി 90 വാങ്ങി ഉപയോഗിക്കുമ്പോൾ കിലോ മീറ്ററിന് 50 പൈസയായിരിക്കും ചെലവ്. എന്നാല്‍ കിലോ മീറ്ററിന് വെറും ആറ് പൈസ മുടക്കി കാര്‍ വാടകക്ക് ഉപയോഗിക്കാനുള്ള സൗകര്യവും കമ്പനി നൽകുന്നുണ്ട്. കമ്പനിയുടെ ഷോറൂമിലാണ് ഇത്തരത്തിൽ വാഹനം ലഭിക്കുക. വാടകയ്ക്ക് വാഹനം ലഭിക്കുന്നതിന് 600 രൂപ നല്‍കിയാല്‍ മതി.
രണ്ടു പേർക്കു യാത്രാസൗകര്യമുള്ള കാറിൽ നിന്ന് കമ്പനി പുറമേ നാല് സീറ്റുള്ള കാറും ആറ് സീറ്റുള്ള ബസും പുറത്തിറക്കാനും പദ്ധതിയിടുന്നുണ്ട്.
