മാഹി: മാഹി റെയില്‍വേ സ്റ്റേഷന് സമീപം അഴിയൂരില്‍ ആറ് ബോംബുകള്‍ കണ്ടെത്തി. പുളിയേരി നടഭാഗം ഒതയോത്ത് പരവന്റെവിടയിലെ റെയില്‍വേ സ്റ്റേഷന് സമീപത്തെ ഒഴിഞ്ഞ പറമ്പിലാണ് ഒരു സ്റ്റീല്‍ ബോംബും അഞ്ച് നാടന്‍ ബോംബുകളും കണ്ടെത്തിയത്.
അയല്‍വാസിയായ സ്ത്രീ പറമ്പിലെ നാഗത്തറയില്‍ വിളക്ക് കത്തിയ്ക്കാന്‍ എത്തിയപ്പോഴാണ് ബോംബ് ശ്രദ്ധയില്‍പ്പെടുന്നത്. സംഭവം അറിഞ്ഞ് പരിഭ്രാന്തരായ നാട്ടുകാര്‍ സ്ഥലത്ത് തടിച്ചുകൂടി. പോലീസും ബോംബ് സ്വാഡും സ്ഥലത്തെത്തി ബോംബുകള്‍ കസ്റ്റഡിയിലെടുത്തു.
ആളൊഴിഞ്ഞ സ്ഥലമായതിനാല്‍ രാത്രികാലങ്ങളില്‍ അപരിചിതര്‍ സ്ഥലത്ത് എത്താറുണ്ടെന്ന് പ്രദേശവാസികള്‍ പോലീസിനോട് പറയുന്നു. വലിയ ഗ്രൗണ്ട് അടക്കമുള്ള പ്രദേശം രാത്രി കാലങ്ങളില്‍ സാമൂഹിക വിരുദ്ധരുടെ താവളമായി മാറിയിരിക്കുകയാണ്. പ്രദേശത്ത് പോലീസിന്റെ നിരീക്ഷണം ശക്തമാക്കണമെന്ന് നാട്ടുകാര്‍ പോലീസിനോട് ആവശ്യപ്പെട്ടു.
