മുംബൈ: ഇന്ത്യന്‍ ക്രിക്കറ്റ് യുവതാരം ശുഭ്മാന്‍ ഗില്ലിന് നാള്‍ക്കുനാള്‍ ആരാധകര്‍ വര്‍ദ്ധിച്ചുവരികയാണ്. 23കാരനായ ഗില്ലിന് 12 മില്യണിലധികം ആരാധകര്‍ ഇന്‍സ്റ്റാഗ്രാമില്‍ മാത്രമായുണ്ട്. കൂടാതെ നിരവധി ആരാധകരും ഗില്ലിന്റെ പേരില്‍ പേജുകള്‍ നിര്‍മ്മിച്ചിട്ടുണ്ട്. എന്നാല്‍ അടുത്തിടെ ഗില്ലിനെ വ്യത്യസ്തമായ ഒരു രീതിയില്‍ സമീപിച്ചിരിക്കുകയാണ് ഒരു ആരാധിക.
പ്രിയ താരത്തിന്റെ ഫോട്ടോകളാണ് വിദ്യാര്‍ത്ഥിനിയുടെ ഇന്‍സ്റ്റാഗ്രാം അക്കൗണ്ടില്‍ കൂടുതലും ഉള്ളത്. അതിനിടെ ഇപ്പോള്‍ നടക്കുന്ന ഇംഗ്ലണ്ടുമായുള്ള മത്സരങ്ങളിലെ ഗില്ലിന്റെ മികച്ച പ്രകടനമാണ് ആരാധക സംഘം ആഘോഷമാക്കാന്‍ കാത്തിരിക്കുന്നത്. ഇംഗ്ലണ്ടിനെതിരായ പരമ്പരയില്‍ നന്നായി കളിക്കുമ്പോഴും ഗില്‍ സ്ഥിരത വീണ്ടെടുത്തിട്ടില്ല. താരത്തിന്റെ മികവ് വീണ്ടെടുക്കാന്‍ കൂടുതല്‍ അവസരങ്ങള്‍ ഇന്ത്യന്‍ ടീം നല്‍കുന്നുണ്ട്.
പരീക്ഷക്കാലമായിട്ടും പഠിച്ചു തുടങ്ങാത്ത വിദ്യാര്‍ത്ഥിനിയാണ് താരമായത്. തന്റെ ഇന്‍സ്റ്റഗ്രാം റീലില്‍ ശുഭ്മാന്‍ ഗില്‍ കമന്റ് ചെയ്യുകയാണെങ്കില്‍ പഠിച്ചു തുടങ്ങാമെന്ന് വിദ്യാര്‍ത്ഥിനി പോസ്റ്റ് ചെയ്തു. പിന്നീട് സംഭവിച്ചത് അപ്രതീക്ഷിതമായ കാര്യങ്ങളായിരുന്നു. ഫാന്‍ ഗേളിന്റെ ഇന്‍സ്റ്റഗ്രാം വീഡിയോക്ക് താഴെ ശുഭ്മാന്‍ ഗില്‍ കമന്റിട്ടു. പഠനം തുടങ്ങൂ എന്നായിരുന്നു ഇന്ത്യന്‍ താരത്തിന്റെ കമന്റ്.
