മുംബൈ: ത്രിരാഷ്ട്ര ഫുട്‌ബോള്‍ ടൂര്‍ണമെന്റില്‍ ആതിഥേയരായ ഇന്ത്യയ്ക്ക് വിജയത്തുടക്കം.
ഒരു ലീഡ് വഴങ്ങിയശേഷം മുന്നേറിയ ഇന്ത്യ മൗറീഷ്യസിനെ ഒന്നിനെതിരെ രണ്ട് ഗോൾ നേടിയാണ് വിജയം കൈവരിച്ചത്.
റോബിന്‍സണ്‍ (37), ബല്‍വന്ത് സിങ് (62) എന്നിവരാണ് ഇന്ത്യയ്ക്കുവേണ്ടി ഗോള്‍ നേടിയത്. മെര്‍വിന്‍ ജോസ്‌ലിന്റെ (15) വകയായിരുന്നു മൗറീഷ്യസിന്റെ ഗോള്‍.
ടൂര്‍ണമെന്റില്‍ സെന്റ് കിറ്റ്‌സിനെതിരെയാണ് ഇന്ത്യയുടെ അടുത്ത മത്സരം. ഇന്ത്യയുടെ തുടര്‍ച്ചയായ ഒന്‍പതാം അന്താരാഷ്ട്ര വിജയമാണിത്.
സുനില്‍ ഛേത്രിയുടെ അഭാവത്തില്‍ ഇറങ്ങിയ ഇന്ത്യ 4-1-3-2 എന്ന ശൈലിയിലാണ് കളിച്ചത്. കേരള ബ്ലാസ്‌റ്റേഴ്‌സ് താരം സന്ദേശ് ജിംഗനാണ് ടീമിനെ നയിച്ചത്.
മലയാളി താരം അനസ് എടത്തൊടികയും പ്രതിരോധനിരയില്‍ അണിനിരന്നു.
ആദ്യ പകുതിയില്‍ മൗറീഷ്യസിനായിരുന്നു മുൻതൂക്കം. മികച്ച നീക്കങ്ങൾ നടത്തി തുടക്കത്തില്‍ തന്നെ ആക്രമിച്ചു കളിക്കുകയായിരുന്നു മൗറീഷ്യസ്.
