പാരീസ്: ഫ്രഞ്ച് ഓപ്പണില്‍ ഒമ്പതാം സീഡ് അഗ്‌നിയേസ്‌ക റാഡ്വാന്‍സ്‌ക മൂന്നാം റൗണ്ടില്‍ പുറത്തായി.
ഫ്രഞ്ച് താരം 151-ാം റാങ്കുകാരി അലിസ് കോര്‍ണറ്റാണ് റാഡ്വാന്‍സ്‌കയെ പരാജയപ്പെടുത്തിയത്.
നേരിട്ടുള്ള സെറ്റുകള്‍ക്കായിരുന്നു ലോക എട്ടാം നമ്പര്‍താരത്തിന്റെ തോല്‍വി. പൊരുതാന്‍ പോലുമുള്ള അവസരം നല്‍കാതെ റോളണ്ട് ഗാരോസിലെ മണ്ണില്‍ നിന്നും റാഡ്വാന്‍സ്‌കയെ കോര്‍ണറ്റ് കെട്ടുകെട്ടിച്ചു. സ്‌കോര്‍: 6-2, 6-1.
ആദ്യ സെറ്റ് കേവലം 38 മിനിറ്റുകൊണ്ടാണ് കോര്‍ണറ്റ് സ്വന്തമാക്കിയത്. രണ്ടാം സെറ്റില്‍ ആദ്യ ഗെയിം മാത്രമാണ് റാഡ്വാന്‍സ്‌ക വിജയിച്ചത്. പിന്നീടങ്ങോട്ട് പോളണ്ടുകാരിയെ കാഴ്ചക്കാരിയാക്കി കോര്‍ണറ്റ് ജയിച്ചുകയറുകയായിരുന്നു. ഇരുവരും തമ്മില്‍ നടന്ന ഒമ്പത് മത്സരങ്ങളില്‍ ഇത് രണ്ടാമതാണ് കോര്‍ണറ്റ് വിജയിയാകുന്നത്.
