മാള: ഫേയ്‌സ്ബുക്കിലൂടെ പരിചയപ്പെട്ട പെണ്‍കുട്ടിയുടെ മുഖം ബ്ലേഡ് കൊണ്ട് വരഞ്ഞ് മുറിവുണ്ടാക്കിയ സംഭവത്തില്‍ രണ്ട് യുവാക്കള്‍ അറസ്റ്റില്‍. വെസ്റ്റ് കൊരട്ടി തോട്ടൂക്കര വീട്ടില്‍ സൗരവ് (19), പുളിയനം കോവാട്ട് നിധിന്‍ (18) എന്നിവരെയാണ് പൊലീസ് അറസ്റ്റ് ചെയ്തത്.
പെണ്‍കുട്ടിയെ പരിചയപ്പെട്ട സൗരവ് കുറച്ച് കാലമായി പെണ്‍കുട്ടിയെ പിന്തുടര്‍ന്ന് ശല്യം ചെയ്യുകയും പ്രണയാഭ്യര്‍ത്ഥന നടത്തുകയും ചെയ്തിരുന്നു. എന്നാല്‍ ഇത് പെണ്‍കുട്ടി നിരസിച്ചതിനാണ് മുഖത്ത് വരഞ്ഞ് മുറിവേല്‍പ്പിച്ചത്.
സ്വകാര്യ കോളേജിലേക്ക് പോകുംവഴി മാള പള്ളിക്ക് സമീപത്തുവച്ചായിരുന്നു ആക്രമണം. ബസ് സ്റ്റാന്‍ഡ് പരിസരത്തുവെച്ച് പെണ്‍കുട്ടിയെ ഇവര്‍ തടഞ്ഞുനിര്‍ത്തിയെങ്കിലും പെണ്‍കുട്ടി അവിടെനിന്ന് രക്ഷപ്പെടുകയായിരുന്നു. പിന്‍തുടര്‍ന്നെത്തിയ ഇവര്‍ പള്ളിക്ക് സമീപം വിജനമായ സ്ഥലത്തുവെച്ച് ആക്രമിക്കുകയായിരുന്നു. സൗരവ് ആണ് ബ്ലേഡുകൊണ്ട് മുഖത്ത് വരഞ്ഞത്. നിധിന്‍ ആണ് ബൈക്ക് ഓടിച്ചിരുന്നതെന്ന് പൊലീസ് പറഞ്ഞു.
മുഖത്ത് ആഴത്തില്‍ പരിക്കേറ്റ പെണ്‍കുട്ടി തൃശ്ശൂരിലെ സ്വകാര്യ ആശുപത്രിയില്‍ ചികിത്സയിലാണ്. പെണ്‍കുട്ടിയുടെ വീട്ടുകാരുടെ പരാതിയുടെ അടിസ്ഥാനത്തില്‍ നടത്തിയ അന്വേഷണത്തിലാണ് ഇവരെ പിടികൂടിയത്. പ്രതികളെ കോടതിയില്‍ ഹാജരാക്കി.
girl’s face drops with blade youth arrested
