സിലുവാപുര്‍: ഉത്തര്‍പ്രദേശിലെ സിലുവാപുര്‍ ഗ്രാമത്തില്‍ കര്‍ഷകനായ സര്‍വേശ് കുമാര്‍ പട്ടേല്‍ പാന്റിന്റെ പോക്കറ്റില്‍ സൂക്ഷിച്ചിരുന്ന പുത്തന്‍ നോട്ടുകള്‍ ഭക്ഷണമാക്കി പണക്കൊതിയന്‍ ആട്.
ആട് എന്തോ കാര്യമായി ചവച്ചിറക്കുന്നത് കണ്ടെങ്കിലും ആടിന്റെ വായിലുള്ള വസ്തുവിന്റെ പിങ്ക് നിറം ശ്രദ്ധയില്‍ പെട്ടപ്പോഴാണ് ആട് ചവച്ചിറക്കുന്നത് തന്റെ പാന്റിന്റെ പോക്കറ്റിലുണ്ടായിരുന്ന രണ്ടായിരം രൂപാനോട്ടുകളാണെന്ന് ഉടമസ്ഥന് മനസ്സിലായത്.
സര്‍വേശ് ശബ്ദമുണ്ടാക്കി ആടിനെ പിന്‍തിരിപ്പിക്കാന്‍ ശ്രമിച്ചെങ്കിലും സാധിച്ചില്ല. ആകെ 2000 രൂപയുടെ ഒരു നോട്ടുമാത്രമാണ് ആടിന്റെ വായില്‍നിന്ന് രക്ഷിച്ചെടുക്കാന്‍ സാധിച്ചത്. ബാക്കി 66,000 രൂപയുടെ നോട്ടുകള്‍ ആട് ആമാശയത്തിലാക്കി കഴിഞ്ഞിരുന്നു.
“കടലാസുകൊണ്ടുള്ള എല്ലാ വസ്തുക്കളും കഴിക്കുന്ന സ്വഭാവമുള്ള ആടാണ് ഇതെന്നും പോക്കറ്റിലുണ്ടായിരുന്ന നോട്ടുകള്‍ അത് ഭക്ഷിക്കുകയായിരുന്നു. എന്തുചെയ്യാനാണ്, ഈ ആട് എനിക്ക് സ്വന്തം കുഞ്ഞിനെപ്പോലെയാണെന്നും” സര്‍വേശ് പറഞ്ഞു.
