ന്യൂഡല്‍ഹി: ഇലക്ട്രോണിക്‌സ് നിര്‍മാതാക്കളായ എച്ച്.പിയുമായി സഹകരിച്ച് ഇന്ത്യയില്‍ ക്രോംബുക്കുകള്‍ നിര്‍മിക്കാനൊരുങ്ങി ഗൂഗിള്‍. കഴിഞ്ഞ ദിവസം ഗൂഗിള്‍ മേധാവി സുന്ദര്‍ പിച്ചൈ എക്‌സില്‍ കുറിച്ച വിവരങ്ങളില്‍ നിന്നുമാണ് പദ്ധതി വെളിപ്പെടുന്നത്. ഇന്ത്യയിലെ വിദ്യാര്‍ത്ഥികള്‍ക്ക് താങ്ങാനാവുന്ന വിലയില്‍ സുരക്ഷിതമായ കംപ്യൂട്ടര്‍ ഉപകരണങ്ങള്‍ സ്വന്തമാക്കാന്‍ ഇത് അവസരം ഒരുക്കുമെന്നും അദ്ദേഹം കൂട്ടിച്ചേര്‍ത്തു. എച്ച്.പിയുടെ ചെന്നൈയിലെ പ്ലാന്റിലായിരിക്കും ക്രോംബുക്കുകള്‍ നിര്‍മിക്കുകയെന്നാണ് റിപ്പോര്‍ട്ടുകള്‍.
ഇതാദ്യമായാണ് ഇന്ത്യയില്‍ ക്രോംബുക്കുകള്‍ നിര്‍മിക്കുന്നതെന്ന് സുന്ദര്‍പിച്ചൈ കുറിച്ചു. ‘ക്രോംബുക്ക് ഡിവൈസുകള്‍ ഇന്ത്യയില്‍ നിര്‍മിക്കാനുള്ള ഗൂഗിളിന്റെ പദ്ധതിയില്‍ സന്തോഷം. പ്രധാനമന്ത്രി നരേന്ദ്ര മോദിയുടെ കാഴ്ചപ്പാടും പിഎല്‍ഐ പോളിസികളും ഇന്ത്യയെ അതിവേഗം ഇലക്ട്രോണിക്‌സ് നിര്‍മാണ രംഗത്തെ മികച്ച പങ്കാളിയാക്കി മാറ്റുകയാണ്. ഏറ്റവും പുതിയ ഹാര്‍ഡ്‌വെയര്‍ പിഎല്‍ഐ 2.0 പദ്ധതി ഇന്ത്യയില്‍ ലാപ്‌ടോപ്, സെര്‍വര്‍ നിര്‍മാണത്തിന് ഊര്‍ജമായി മാറും’ എന്ന് കേന്ദ്ര ഐ.ടി മന്ത്രി രാജീവ് ചന്ദ്രശേഖര്‍ എക്‌സില്‍ കുറിച്ചു.
2020 ഓഗസ്റ്റ് മാസം മുതല്‍ ഇവിടെ എച്ച്.പി തങ്ങളുടെ ലാപ്‌ടോപ്പുകളും ഡെസ്‌ക്ടോപ്പ് കംപ്യൂട്ടറുകളും നിര്‍മിക്കുന്നുണ്ട്. ഒക്ടോബര്‍ മാസം തന്നെ ക്രോംബുക്കുകളുടെ നിര്‍മാണം തുടങ്ങുമെന്നും കുറഞ്ഞ വിലയില്‍ ലഭ്യമാവുന്ന കംപ്യൂട്ടറുകള്‍ക്ക് ഇന്ത്യയിലുള്ള ഡിമാന്റ് ഉപയോഗപ്പെടുത്തുന്ന തരത്തില്‍ ഇവിടെ നിന്ന് ക്രോംബുക്കുകള്‍ പുറത്തിറങ്ങുമെന്നും റിപ്പോര്‍ട്ടുകള്‍ പറയുന്നു. ലോകമെമ്പാടും 50 ദശലക്ഷത്തിലധികം വിദ്യാര്‍ത്ഥികളും അധ്യാപകരും ക്രോംബുക്കുകള്‍ ഉപയോഗിക്കുന്നുണ്ടെന്നാണ് കണക്ക്. പ്രധാനമായും വിദ്യാര്‍ത്ഥികളെയാണ് ക്രോംബുക്കുകളിലൂടെ ഗൂഗിളും, എച്ച്.പിയും ലക്ഷ്യമിടുന്നത്.
