ദി ഗ്രേറ്റ് ഫാദര്‍ എന്ന വമ്പന്‍ ഹിറ്റ് ചിത്രമൊരുക്കി മലയാള സിനിമയില്‍ അരങ്ങേറിയ സംവിധായകന്‍ ഹനീഫ് അദനിയും മമ്മൂട്ടിയും വീണ്ടും ഒന്നിക്കുന്നു. പൂര്‍ണ്ണമായും ദുബായ് കേന്ദ്രമാക്കി കഥ പറയുന്ന ഈ ചിത്രത്തിന്റെ ടൈറ്റില്‍ ലോഞ്ച് വരുന്ന ശനിയാഴ്ച നടക്കും.
ശനിയാഴ്ച വൈകുന്നേരം ആറു മണിക്ക് മെഗാ സ്റ്റാര്‍ മമ്മൂട്ടിയുടെ ഒഫീഷ്യല്‍ ഫേസ്ബുക് പേജിലൂടെയാണ് ചിത്രത്തിന്റെ ടൈറ്റില്‍ പ്രഖ്യാപിക്കുക. ബിഗ് ബഡ്ജറ്റില്‍ ഒരുക്കുന്ന ഈ ആക്ഷന്‍ ചിത്രം സംവിധാനം ചെയ്യുന്നത് വിനോദ് വിജയന്‍ ആണ്. മമ്മൂട്ടി ചിത്രത്തിന് തിരക്കഥ രചിക്കുന്നത് ഹനീഫ് അദനി ആണ്.
മമ്മൂട്ടിയുടെ കരിയറിലെ തന്നെ ഏറ്റവും മികച്ച വിജയങ്ങളില്‍ ഒന്നാണ് ഹനീഫ് അദനി ഒരുക്കിയ ദി ഗ്രേറ്റ് ഫാദര്‍. അതിനു ശേഷം ഹനീഫ് അദനി എത്തിയത് മറ്റൊരു മമ്മൂട്ടി ചിത്രത്തിന്റെ രചയിതാവ് ആയാണ്. ഷാജി പാടൂര്‍ ഒരുക്കിയ അബ്രഹാമിന്റെ സന്തതികള്‍ എന്ന ചിത്രമായിരുന്നു അത്. ഈ വര്‍ഷം റിലീസ് ചെയ്ത ആ ചിത്രവും സൂപ്പര്‍ വിജയം നേടി.
മമ്മൂട്ടി വൈശാഖ് ഒരുക്കുന്ന മധുര രാജ എന്ന ചിത്രത്തില്‍ അഭിനയിച്ചു കൊണ്ടിരിക്കുകയാണ്. അതിനു ശേഷം ഖാലിദ് റഹ്മാന്റെ ഉണ്ട, സജീവ് പിള്ളയുടെ മാമാങ്കം എന്നിവയാണ് മമ്മൂട്ടിയുടെ അടുത്ത ചിത്രങ്ങള്‍. മാമാങ്കത്തിന്റെ രണ്ടു ഷെഡ്യൂള്‍ ഇതിനോടകം പൂര്‍ത്തിയാക്കിയിട്ടുണ്ട്. ശ്യാമ പ്രസാദ് ചിത്രമായ ആളോഹരി ആനന്ദവും മമ്മൂട്ടി കമ്മിറ്റ് ചെയ്ത ചിത്രമാണ്.
