തെലുങ്കിലെ ചലച്ചിത്രപ്രവര്‍ത്തകരും തങ്ങളുടെ ആദ്യ ഒറിജിനല്‍ സൂപ്പര്‍ ഹീറോ സിനിമയുമായി എത്തുകയാണ്. ‘ഹനു-മാന്‍’ എന്ന ടൈറ്റിലില്‍ നിര്‍മിക്കുന്ന ചിത്രത്തില്‍ ടൈറ്റില്‍ കഥാപാത്രമായി എത്തുന്നത് തേജ സജ്ജയാണ്. ചിത്രത്തിന്റെ ഫസ്റ്റ് ലുക്ക് വീഡിയോ പുറത്തിറങ്ങി.
പ്രശാന്ത് വര്‍മയാണ് ചിത്രം സംവിധാനം ചെയ്യുന്നത്. പുരാണങ്ങളില്‍ നിന്ന് പ്രചോദനം ഉള്‍ക്കൊണ്ട് ഒരുക്കുന്ന ഹനു- മാന്‍ എന്ന ചിത്രത്തിന്റെ തിരക്കഥ എഴുതിയിരിക്കുന്നത് പ്രശാന്ത് വര്‍മ തന്നെയാണ്. വരലക്ഷ്മി ശരത് കുമാറാണ് ചിത്രത്തിലെ നായികയാവുന്നത് എന്നാണ് സൂചന. ശിവേന്ദ്ര ഛായാഗ്രഹണവും ശ്രീകാന്ത് പട്നായിക് എഡിറ്റങ്ങും നിര്‍വഹിക്കുന്നു.
മലയാളത്തില്‍ പുറത്തിറങ്ങിയ ഇഷ്‌ക് എന്ന ചിത്രത്തിന്റെ തെലുങ്ക് റീമേക്ക് ഇഷ്‌ക്- നോട്ട് എ ലവ് സ്റ്റോറിയായിരുന്നു തേജ സജ്ജയുടെ ഒടുവില്‍ റിലീസായ ചിത്രം. അനുദീപ് ദേവ്, ഹരി ഗൗര, ജയ് ക്രിഷ്, കൃഷ്ണ സൗരഭ് എന്നിവര്‍ ചേര്‍ന്നാണ് സംഗീതം ഒരുക്കുന്നത്.
പ്രൈംഷോ എന്റര്‍ടെയ്ന്‍മെന്റിന്റെ ബാനറില്‍ കെ. നിരഞ്ജന്‍ റെഡ്ഡിയാണ് ഹനു-മാന്‍ നിര്‍മിക്കുന്നത്. തെലുങ്കിന് പുറമെ മലയാളം, തമിഴ്, കന്നഡ, ഹിന്ദി എന്നിങ്ങനെ അഞ്ച് ഭാഷകളിലാണ് ചിത്രം റിലീസ് ചെയ്യുന്നത്.
