റോത്തക്: ഹരിയാനയിൽ കാണാതായ പാട്ടുകാരിയെ കൊല്ലപ്പെട്ട നിലയിൽ കണ്ടെത്തി. റോത്തക്കിലെ ബനിയാനിയിൽ പാടത്ത് കഴുത്തറുത്ത നിലയിലാണ് കാണാതായ മംമ്ത ശർമ്മയുടെ മൃതദേഹം കണ്ടെത്തിയത്.
ഞായറാഴ്ച കാണാതായ മംമ്‌തയെ കണ്ടെത്തുന്നതിനായി പരാതി നൽകിയിരുന്നെങ്കിലും പൊലീസ് അന്വേഷണം നടത്തിയില്ലെന്ന് കുടുംബം ആരോപിച്ചു. മുഖ്യമന്ത്രി മനോഹർ ലാൽ ഖട്ടറിന്റെ ഗ്രാമത്തിൽ നടന്ന സംഭവത്തിൽ പ്രതിഷേധം ശക്തമാണ്.
സോനിപത്തിലെ പരിപാടിയിൽ പങ്കെടുക്കുന്നതിനായി സുഹൃത്ത് മോഹിത് കുമാറിനൊപ്പം മംമ്ത ശർമ്മ പോയിരുന്നു. എന്നാൽ പരിപാടിക്ക് എത്തുന്നതിന് മുമ്പ് മംമ്ത മറ്റൊരു കാറിൽ കയറി പോയിരുന്നുവെന്നാണ് മോഹിത് കുടുംബാംഗങ്ങളെ അറിയിച്ചത്.
കാണാതായ ആദ്യ ദിവസങ്ങളിൽ മംമ്‌‌തയുടെ മൊബൈൽ ഫോൺ റിംഗ് ചെയ്‌തിരുന്ന കാര്യം പൊലീസിനെ അറിയിച്ചെങ്കിലും, ഇതിനെ കുറിച്ച് കാര്യമായി അന്വേഷിക്കാൻ തയ്യാറായില്ലെന്നും ബന്ധുക്കൾ ആരോപിക്കുന്നുണ്ട്. എന്നാൽ പരാതി ലഭിച്ചയുടനെ കേസ് രജിസ്‌റ്റർ ചെയ്‌തെന്നും കുറ്റവാളികളെ കണ്ടെത്താനുള്ള ശ്രമത്തിലാണ് തങ്ങളെന്നും പൊലീസ് വ്യക്തമാക്കി.
