തിരുവനന്തപുരം: സംസ്ഥാനത്ത് കനത്ത മഴയില്‍ ട്രെയിന്‍ ഗതാഗതം പൂര്‍ണമായും നിലച്ച സാഹചര്യത്തില്‍ യാത്രക്കാര്‍ക്ക് സഹായ ഹസ്തവുമായി കെ.എസ്.ആര്‍.ടി.സി. ഔദ്ദ്യോഗിക ഫേസ്ബുക്ക് പേജിലൂടെയാണ് കെ.എസ്.ആര്‍.ടി.സി ഇക്കാര്യം അറിയിച്ചിരിക്കുന്നത്..
യാത്രക്കാരുടെയും പൊതുജനങ്ങളുടെയും സംശയ ദൂരീകരണത്തിനും സഹായത്തിനുമായി 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂം തുറന്നിട്ടുണ്ടെന്ന് കെ.എസ്.ആര്‍.ടി.സി. അറിയിച്ചു.
നെടുമ്പാശ്ശേരി വിമാനത്താവളം അടച്ചതിനാല്‍ വിമാനങ്ങള്‍ വഴിതിരിച്ചുവിടുന്ന കോഴിക്കോട്, തിരുവനന്തപുരം, കണ്ണൂര്‍ എയര്‍പോര്‍ട്ടുകളില്‍ നിന്നും അധിക സര്‍വീസ് ക്രമീകരിച്ചിട്ടുണ്ട്.റെയില്‍ ഗതാഗതം തടസപ്പെട്ട എല്ലാ റയില്‍വേ സ്റ്റേഷനുകളില്‍ നിന്നും കെ എസ് ആര്‍ ടി സി ബസുകള്‍ കേരളത്തിലെ വിവിധ പ്രദേശങ്ങളിലേക്ക് പുറപ്പെടും.
