അന്‍വര്‍ റഷീദ് സംവിധാനം ചെയ്യുന്ന പുതിയ ചിത്രമാണ് ‘ട്രാന്‍സ്’. ചിത്രത്തിന്റെ റിലീസ് തിയതി പ്രഖ്യാപിച്ചു. ചിത്രം അടുത്ത വര്‍ഷം മാര്‍ച്ച് 22 ന് തീയേറ്ററുകളിലെത്തുമെന്ന് അണിയറപ്രവര്‍ത്തകര്‍ അറിയിച്ചു.
യുവനടന്‍ ഫഹദ് ഫാസില്‍ നായകനാവുന്ന ചിത്രത്തിന്റെ ബഡ്ജറ്റ് 15 കോടിയാണ് . സംവിധായകനെന്ന നിലയില്‍ അന്റവറിന്റേയും നടനെന്ന നിലയില്‍ ഫഹദിന്റേയും ഏറ്റവും വലിയ ബഡ്ജറ്റില്‍ ഒരുങ്ങുന്ന സിനിമയായിരിക്കും ട്രാന്‍സ്.
ചിത്രത്തിന്റെ കഥ എന്തെന്ന് സംബന്ധിച്ച ഒരു സൂചനയും അണിയറപ്രവര്‍ത്തകര്‍ പുറത്ത് വിട്ടിട്ടില്ല. ഫഹദ് ഫാസിലിനെ കൂടാതെ സൗബിന്‍ ഷാഹിര്‍, വിനായകന്‍, ചെമ്പന്‍ വിനോദ്, ശ്രീനാഥ് ഭാസി, അല്‍ഫോണ്‍സ് പുത്രന്‍ എന്നിവരാണ് ഈ സിനിമയിലെ മറ്റു പ്രധാനതാരങ്ങള്‍.
വിന്‍സന്റ് വടക്കനാണ് ചിത്രത്തിന്റെ തിരക്കഥ എഴുതുന്നത്. അമല്‍ നീരദാണ് ഛായാഗ്രാഹകന്‍. സംഗീതം ജാക്‌സണ്‍ വിജയനും അജയന്‍ ചാലശേരി കലാസംവിധാനവും നിര്‍വഹിക്കും. അന്‍വര്‍ റഷീദ് എന്റര്‍ടൈന്‍മെന്റിന്റെ ബാനറില്‍ നിര്‍മ്മിക്കുന്ന ചിത്രത്തിന്റെ സൗണ്ട് ഡിസൈനര്‍ ഓസ്‌കാര്‍ ജേതാവ് റസൂല്‍ പൂക്കുട്ടിയാണ്.
