മോഹവിലയില്‍ പുത്തൻ ബൈക്ക് അവതരിപ്പിച്ച് ഹോണ്ട

ജാപ്പനീസ് ജനപ്രിയ ഇരുചക്ര വാഹന ബ്രാൻഡായ ഹോണ്ട മോട്ടോർസൈക്കിള്‍സ് സ്‍കൂട്ടർ ഇന്ത്യ പുതിയ 100 സിസി കമ്മ്യൂട്ടർ മോട്ടോർസൈക്കിൾ ഇന്ത്യൻ വിപണിയിൽ അവതരിപ്പിച്ചു. ഷൈൻ 100 എന്നാണ് ഇതിന്റെ പേര്. 64,900 രൂപയാണ് ഇതിന്റെ പ്രാരംഭ എക്‌സ്‌ഷോറൂം വില. മോട്ടോർസൈക്കിളിന്റെ ബുക്കിംഗും ആരംഭിച്ചു. സിറ്റി ട്രാഫിക്കിൽ ദിവസവും ഉപയോഗിക്കാവുന്ന തരത്തിലാണ് മോട്ടോർസൈക്കിൾ പ്രത്യേകം രൂപകൽപ്പന ചെയ്തിരിക്കുന്നത്. ഗ്രാമീണ, അർദ്ധ നഗര വിപണികളെയാണ് ഇത് ലക്ഷ്യമിടുന്നത്. ഹീറോ സ്‌പ്ലെൻഡർ പ്ലസ്, ബജാജ് പ്ലാറ്റിന 100, ടിവിഎസ് സ്റ്റാർ സിറ്റി പ്ലസ് തുടങ്ങിയ മോട്ടോർസൈക്കിളുകളോടായിരിക്കും ഈ മോട്ടോർസൈക്കിൾ മത്സരിക്കുക.

പുതിയ 100 സിസി, സിംഗിൾ സിലിണ്ടർ, എയർ കൂൾഡ് എഞ്ചിനാണ് ഹോണ്ട ഷൈൻ 100ന്റെ സവിശേഷത. ഇന്ധനക്ഷമത മെച്ചപ്പെടുത്തുന്നതിനായി ഇതിന് ഫ്യൂവൽ ഇഞ്ചക്ഷനും ഇഎസ്പിയും ലഭിക്കുന്നു. പുതിയ വരാനിരിക്കുന്ന BS6 ആര്‍ഡിഇ മാനദണ്ഡങ്ങൾ എഞ്ചിൻ പാലിക്കുന്നു. ഇന്ധന പമ്പ് ഇന്ധന ടാങ്കിന് പുറത്താണ് സ്ഥാപിച്ചിരിക്കുന്നത്. ഇത് ഓട്ടോ ചോക്ക് സിസ്റ്റവുമായി വരുന്നു. ഇത് 7,500 ആർപിഎമ്മിൽ 7.5 ബിഎച്ച്പിയും 6,000 ആർപിഎമ്മിൽ 8.05 എൻഎം ടോർക്കും ഉൽപ്പാദിപ്പിക്കും.

168 എംഎം ഗ്രൗണ്ട് ക്ലിയറൻസാണ് ഈ മോട്ടോർസൈക്കിളിന് ഉള്ളത്. ഡിസൈനിന്റെ കാര്യത്തിൽ, ഷൈൻ 125 ന്റെ ചെറിയ പതിപ്പ് പോലെയാണ് ഷൈൻ 100. അഞ്ച് കളർ ഓപ്ഷനുകളിൽ ഇത് വാഗ്ദാനം ചെയ്യും. ഷൈൻ 100-ൽ ഫ്രണ്ട് കൗൾ, ബ്ലാക്ക്ഡ്-ഔട്ട് അലോയ് വീലുകൾ, അലുമിനിയം ഗ്രാബ് റെയിൽ, സ്ലീക്ക് മഫ്‌ളർ എന്നിവ സജ്ജീകരിച്ചിരിക്കുന്നു. ചുവപ്പ് വരകളുള്ള കറുപ്പ്, നീല വരകളുള്ള കറുപ്പ്, പച്ച വരകളുള്ള കറുപ്പ്, സ്വർണ്ണ വരകളുള്ള കറുപ്പ്, ചാര വരകളുള്ള കറുപ്പ് എന്നിവയുണ്ട്.

ഷൈൻ 100-ന് ഹോണ്ട ആറുവർഷത്തെ പ്രത്യേക വാറന്റി പാക്കേജും (3 വർഷത്തെ സ്റ്റാൻഡേർഡ് + 3 വർഷത്തെ ഓപ്ഷണൽ എക്സ്റ്റൻഡഡ് വാറന്റി) വാഗ്ദാനം ചെയ്യുന്നു. മോട്ടോർസൈക്കിളിന് 1.9 മീറ്റർ ടേണിംഗ് റേഡിയസ് ഉണ്ട്. ഷൈൻ 100 ന്റെ സീറ്റ് ഉയരം 786 എംഎം ആണ്, ഇക്വലൈസറോട് കൂടിയ കോംബി-ബ്രേക്ക് സിസ്റ്റം (CBS) സഹിതമാണ് ഇത് വരുന്നത്. സൈഡ്-സ്റ്റാൻഡ് എഞ്ചിൻ കട്ട്-ഓഫ് ഫീച്ചറും ഓഫറിലുണ്ട്.

“ഷൈൻ അതിന്റെ വിഭാഗത്തിലെ ഏറ്റവും ജനപ്രിയവും വിശ്വസനീയവുമായ മോട്ടോർസൈക്കിൾ ബ്രാൻഡാണ്. ഇന്ന് ഞങ്ങൾ ഹോണ്ടയുടെ പുതിയ 100 സിസി മോട്ടോർസൈക്കിൾ – ഷൈൻ 100 അനാവരണം ചെയ്യുന്നു, ഇത് ഷൈൻ പൈതൃകം ശക്തിപ്പെടുത്തുന്നതിനായി രൂപകൽപ്പന ചെയ്യുകയും നിർമ്മിക്കുകയും ചെയ്യുന്നതാണ്” പുതിയ ഷൈൻ 100 ലോഞ്ച് ചെയ്തുകൊണ്ട് ഹോണ്ട മോട്ടോർസൈക്കിൾ ആൻഡ് സ്കൂട്ടർ ഇന്ത്യയുടെ മാനേജിംഗ് ഡയറക്ടറും പ്രസിഡന്റും സിഇഒയുമായ ശ്രീ അറ്റ്സുഷി ഒഗാറ്റ പറഞ്ഞു. ഇന്ത്യയിലുടനീളമുള്ള ആളുകൾക്ക് മൊബിലിറ്റി കൂടുതൽ ആക്സസ് ചെയ്യാവുന്നതും താങ്ങാനാവുന്നതുമാക്കുന്നതിനുള്ള ഹോണ്ടയുടെ അടുത്ത വലിയ കുതിപ്പാണ് ഷൈൻ 100 എന്നും അടിസ്ഥാന യാത്രാ വിഭാഗത്തിലെ ഉപഭോക്താക്കൾക്കായി കരുത്തുറ്റതും വിശ്വസനീയവും ഇന്ധനക്ഷമതയുള്ളതുമായ മോട്ടോർസൈക്കിൾ അവതരിപ്പിക്കുന്നതിൽ അഭിമാനിക്കുന്നുവെന്നും അദ്ദേഹം വ്യക്തമാക്കി.