ഐ ലീഗില്‍ മോഹന്‍ ബഗാനെ സമനിലയില്‍ കുരുക്കി ചെന്നൈ സിറ്റി. രണ്ട് ടീമും ഓരോ ഗോള്‍ വീതമാണ് നേടിയത്. മോഹന്‍ ബഗാന്റെ തട്ടകത്തില്‍ വച്ചായിരുന്നു മത്സരം നടന്നത്. മത്സരത്തിന്റെ 45-ാം മിനുട്ടില്‍ നോന്‍ഡാമ്പ നയോറീമിന്റെ അസിസ്റ്റില്‍ ബാബ മോഹന്‍ ബഗാനെ മുന്നിലെത്തിക്കുകയായിരുന്നു.
ചെന്നൈ സിറ്റി 67-ാം മിനുട്ടിലാണ് സമനില നേടിയത്. മത്സരത്തിന്റെ അവസാന മിനുട്ടില്‍ രണ്ട് ടീമും വാശിയോടെ കളിച്ചെങ്കിലും ഫലം ഉണ്ടായില്ല.
മോഹന്‍ ബഗാന്‍ 15 മത്സരത്തില്‍ 36 പോയിന്റുമായി ഒന്നാം സ്ഥാനത്താണ്. 11 ജയവും മൂന്ന് സമനിലയും ഒരു തോല്‍വിയുമാണ് ടീം സ്വന്തമാക്കിയത്. 15 മത്സരത്തില്‍ നിന്നും 23 പോയിന്റുമായി പഞ്ചാബാണ് രണ്ടാം സ്ഥാനത്തുള്ളത്. ചെന്നൈ സിറ്റി 15 മത്സരത്തില്‍ 20 പോയന്റുമായി ആറാം സ്ഥാനത്താണുള്ളത്.
