എ ആര്‍ റഹ്മാന്റെ നിര്‍വഹണത്തില്‍ ഗാനം ആലപിക്കണമെന്ന് പ്രശസ്ത അമേരിക്കന്‍ ഗായിക സെലീന ഗോമസ്. പുതിയ ചിത്രം ഹോട്ടല്‍ ട്രാന്‍സില്‍വാനിയ 3യുടെ പ്രൊമോഷന്റെ ഭാഗമായാണ് സെലീന ആവശ്യം ഉന്നയിച്ചത്.
‘ഇന്ത്യയിലെ ഒരുപാട് ഗായകരെ ഞാന്‍ പിന്തുടരാറുണ്ട്. അവരെല്ലാം മികവുറ്റവരാണെന്ന് തന്നെയാണ് എന്റെ വിശ്വാസം. എ ആര്‍ റഹ്മാന്റെ വര്‍ക്കുകള്‍ എനിക്കിഷ്ടമാണ്. ഇന്നത്തെ ആഗോള താരമാണ് അദ്ദേഹം. അദ്ദേഹത്തിന്റെ സംഗീതത്തില്‍ ഒരു ഗാനം ആലപിക്കണമെന്ന് ആഗ്രഹമുണ്ട്. അത് ഒരു ബോളിവുഡ് സിനിമയ്ക്കു വേണ്ടിയായാല്‍ മനോഹരമായിരിക്കും’ സെലീന പറഞ്ഞു.
ഹോളിവുഡ് ചിത്രങ്ങള്‍ക്കു വേണ്ടിയും എ ആര്‍ റഹ്മാന് സംഗീതം ഒരുക്കിയിട്ടുണ്ട്. സ്ലംഡോഗ് മില്യണയര്‍, 127 അവേഴ്‌സ്, മില്യണ്‍ ഡോളര്‍ ആം, പീപ്പിള്‍ ലൈക്ക് അസ് ആന്റ് പെലെ; ബര്‍ത്ത് ഓഫ് എ ലെജന്‍ഡ് എന്നിവയാണ് എ ആര്‍ റഹ്മാന് സംഗീതം നല്‍കിയ ചിത്രങ്ങള്‍.
