ഐസിസി റാങ്കിംഗിൽ വൻ മുന്നേറ്റവുമായി ശുഭ്മൻ ഗിൽ. 45 സ്ഥാനങ്ങൾ മെച്ചപ്പെടുത്തി 38ആം റാങ്കിലേക്കാണ് ഗിൽ എത്തിയത്. സിംബാബ്‌വെക്കെതിരായ പരമ്പരയിലെ തകർപ്പൻ പ്രകടനമാണ് ഗില്ലിനു തുണയായത്. മൂന്ന് മത്സരങ്ങളിൽ നിന്ന് 245 അടിച്ചുകൂട്ടിയ ഗിൽ ആയിരുന്നു പരമ്പരയിൽ ഏറ്റവുമധികം റൺസ് നേടിയത്.
പാകിസ്താൻ ക്യാപ്റ്റൻ ബാബർ അസം റാങ്കിംഗിൽ ഒന്നാമതാണ്. ദക്ഷിണാഫ്രിക്കയുടെ റസ്സി വാൻഡർ ഡസ്സൻ രണ്ടാം സ്ഥാനത്ത്. മുൻ ഇന്ത്യൻ നായകൻ വിരാട് കോലി അഞ്ചാമതും ക്യാപ്റ്റൻ രോഹിത് ശർമ ആറാം സ്ഥാനത്തുമുണ്ട്. മലയാളി താരം സഞ്ജു സാംസൺ 193ആം റാങ്കിലാണ്.
അതേസമയം, ഇന്ത്യൻ പുരുഷ ക്രിക്കറ്റ് ടീം പരിശീലകൻ രാഹുൽ ദ്രാവിഡിന് കൊവിഡ് പോസിറ്റീവായെന്ന് റിപ്പോർട്ടുണ്ട്. ഏഷ്യാ കപ്പിനായി ഇന്ത്യൻ സംഘം യുഎഇയിലേക്ക് പോവാനിരിക്കെയാണ് ദ്രാവിഡ് കൊവിഡ് ബാധിതനായത്. ഇതോടെ താരം ഏഷ്യാ കപ്പിൽ ഇന്ത്യൻ സംഘത്തിനൊപ്പം ഉണ്ടാവില്ല. പകരം ഇന്ത്യ അണ്ടർ-19, ഇന്ത്യ എ ടീം പരിശീലകനായ മുൻ താരം വിവിഎസ് ലക്ഷ്മൺ യുഎഇയിലേക്ക് തിരിക്കും.
