എറണാകുളം: ആലുവയില്‍ എസ്എഫ്ഐ പ്രവര്‍ത്തകനെ കെ.എസ്.യു സംഘം ചേര്‍ന്ന് മര്‍ദ്ദിച്ചതായി പരാതി. ചൂണ്ടി ഭാരത് മാതാ ലോ കോളജിലാണ് സംഭവം.
നവാഗതരെ സ്വാഗതം ചെയ്യുന്നതിനായി കോളജ് അലങ്കരിക്കുന്നതുമായി ബന്ധപ്പെട്ട പ്രവര്‍ത്തനങ്ങള്‍ക്കായാണ് എസ്എഫ്ഐ ഏരിയ പ്രസിഡന്റ് ഷെഫിനും ഏരിയ ജോയിന്റ് സെക്രട്ടറി ദേവരാജും അവിടെ എത്തിയത്. ഇവരെ കെ.എസ്.യു പ്രവര്‍ത്തകരായ അല്‍ അമീന്‍, ഫാബിയോ, അബിന്‍, നെല്‍സണ്‍ എന്നിവരടങ്ങിയ സംഘം ചേര്‍ന്ന് മര്‍ദ്ദിക്കുകയായിരുന്നു. മര്‍ദ്ദനത്തിന്റെ ദൃശ്യങ്ങള്‍ പുറത്തുവന്നിട്ടുണ്ട്.
പരുക്കേറ്റ രണ്ട് പേരെ കളമശേരി മെഡിക്കല്‍ കോളജില്‍ പ്രവേശിപ്പിച്ചിട്ടുണ്ട്. സംഭവത്തില്‍ പൊലീസ് കേസെടുത്തു. മര്‍ദ്ദനത്തില്‍ ശക്തമായി പ്രതിഷേധിക്കുമെന്ന് എസ്എഫ്ഐ അറിയിച്ചു.
