ഐലീഗ് ഫുട്ബോളില്‍ ഗോകുലം കേരള എഫ്സിക്ക് മിന്നും ജയം. മറുപടിയില്ലാത്ത രണ്ട് ഗോളിന് ട്രാവു എഫ്സിയെ തോല്‍പ്പിച്ചു. നായകന്‍ അലക്സ് സാഞ്ചസ് ഇരട്ടഗോള്‍ നേടി.
കൊല്‍ക്കത്ത കല്യാണി സ്റ്റേഡിയത്തിലും ഗോകുലത്തിന്റെ വിജയക്കുതിപ്പ്. പന്തുരുണ്ട് പതിനാലാം സെക്കന്റില്‍ തന്നെ ഗോകുലം ലീഡ് എടുത്തു. നായകന്‍ അലക്സ് സാഞ്ചസാണ് ഗോകുലത്തിന് ലീഡ് നല്‍കിയത്. മിനുറ്റുകള്‍ക്കകം ഗോകുലം ലീഡ് ഉയര്‍ത്തി. ട്രാവു എഫ്സിയുടെ പിഴവ് മുതലെടുത്ത അലക്സ് സാഞ്ചസ് ഗോള്‍ ഉറപ്പാക്കി.
രണ്ടാംപകുതിയില്‍ ഗോകുലം ഗോള്‍കീപ്പര്‍ ദേവാന്‍ഷ് ചുവപ്പ് കാര്‍ഡ് കണ്ട് പുറത്ത് പോയത് ഗോകുലത്തിന് തിരിച്ചടിയായി. എന്നാല്‍ ഈ അവസരം മുതലെടുക്കാന്‍ ട്രാവുവിന് കഴിഞ്ഞില്ല. തുടര്‍ച്ചയായ മൂന്നാം ജയത്തോടെ ഗോകുലം പോയിന്റ് പട്ടികയില്‍ ഒന്നാം സ്ഥാനത്തെത്തി.
