കൊച്ചി: ഐഎസ്എല്ലില്‍ ഏറ്റവും കൂടുതല്‍ ആരാധക പിന്തുണയുള്ള ടീമായ കേരളാ ബ്ലാസ്റ്റേഴ്സിന്റെ ബൂട്ടണിഞ്ഞ കളിക്കാരെയും മലയാളികള്‍ നെഞ്ചോട് ചേര്‍ത്തിരുന്നു.
അതില്‍ ബ്ലാസ്റ്റേഴ്സിന്റെ വീറുള്ള കളിക്കാരന്‍ ഹൊസുവിന്റെ സ്ഥാനം ഒരു പടി മുകളില്‍ തന്നെയാണ്.
എന്നാല്‍, തന്റെ ആരാധക ലക്ഷങ്ങളെ സങ്കടത്തിലാഴ്ത്തിക്കൊണ്ട് ഇത്തവണ കേരളാ ബ്ലാസ്റ്റേഴിസിന്റെ ചങ്കിടിപ്പിനൊപ്പം കാലുകള്‍ ചലിപ്പിക്കാന്‍ ഹൊസു എത്തില്ലെന്ന് അറിയിച്ചിരിക്കുകയാണ്.
ട്വീറ്റിലൂടെയാണ് അടുത്തവര്‍ഷത്തേക്കുള്ള തന്റെ കരാറായി എന്ന് ഹൊസു അറിയിച്ചിരിക്കുന്നത്, ഒപ്പം കേരളാ ബ്ലാസ്റ്റേഴ്സിന് നന്ദിയും അറിയിച്ചിട്ടുണ്ട്.
ട്വീറ്റ് പുറത്തുവന്നതോടെ ടീം ഡ്രാഫ്റ്റില്‍ ആഹ്ലാദത്തിലായിരുന്ന ആരാധകര്‍ ദുഖത്തിലായി. അടുത്ത വര്‍ഷത്തെ സീസണില്‍ കളിക്കണമെന്നും ചിലര്‍ ഹൊസുവിനോട് ആവശ്യപ്പെട്ടിട്ടുണ്ട്.
യുണൈറ്റഡ് സോക്കര്‍ ലീഗില്‍, സിന്‍സിനാറ്റി എഫ്.സി.ക്ക് കളിക്കുന്ന ഹൊസുവിന്റെ കരാര്‍ നവംബറില്‍ അവസാനിക്കാനിരിക്കെ ക്ലബ് കഴിഞ്ഞ ദിവസം അത് ഒരു വര്‍ഷം കൂടി നീട്ടി. ഇതിനെത്തുടര്‍ന്നാണ് ഹൊസുവിന് ഐഎസ്എല്ലില്‍ നിന്നും വിട്ടു നില്‍ക്കേണ്ടി വന്നത്.
ഇനി എല്ലാക്കണ്ണുകളും ടീമിലേക്ക് പുതുതായി എത്തുന്ന വിദേശ കളിക്കാരിലായിരിക്കും. കോച്ച് റെനി മൊളന്‍സ്റ്റീനും ടീം ഉടമസ്ഥരും ഒരു പുതിയ ടീമിനെ വാര്‍ത്തെടുക്കുകയാണ് ലക്ഷ്യം എന്ന് പ്രഖ്യാപിച്ചുകഴിഞ്ഞു.
എങ്കിലും ഒരു വര്‍ഷമായി ആരാധകര്‍ കാത്തിരിക്കുന്ന ഹൊസുവിനേപ്പോലൊരു താരം വരില്ലെന്നുറപ്പിച്ചത് ബ്ലാസ്റ്റേഴ്സ് ആരാധകര്‍ക്ക് വലിയ ആശങ്കയാണ് സൃഷ്ടിച്ചിരിക്കുന്നത്.
