അബുദാബി: എ.എഫ്.സി ഏഷ്യന്‍ കപ്പ് ഫുട്‌ബോളില്‍ ഇന്ത്യക്ക് തായ്ലന്‍ഡിനെതിരെ തകര്‍പ്പന്‍ ജയം. തായ്‌ലന്‍ഡിനെ 4-1നാണ് ഇന്ത്യ പരാജയപ്പെടുത്തിയത്. സുനില്‍ ഛേത്രി നേടിയ ഇരട്ടഗോളുകളാണ് ഇന്ത്യന്‍ വിജയത്തിന് അടിത്തറയിട്ടത്.
അനിരുദ്ധ് ഥാപ്പയും ജെജെയും ഒരോ ഗോള്‍ വീതം നേടി. 33-ാം മിനിറ്റില്‍ തീരസില്‍ ദംഗ്ഡയിലൂടെ തായ്‌ലന്‍ഡ് ഒരു ഗോള്‍ വലയിലാക്കി.
ക്യാപ്റ്റന്‍ സുനില്‍ ഛേത്രിയിലൂടെ ഇന്ത്യയാണ് ആദ്യം മുന്നിലെത്തിയത്. ഇരുപത്തിയെഴാം മിനിറ്റില്‍ ലഭിച്ച പെനാല്‍റ്റി ഛേത്രി കൃത്യമായി ലക്ഷ്യത്തിലെത്തിച്ചു.
എന്നാല്‍ ഇന്ത്യയുടെ സന്തോഷം അധികനേരം നീണ്ടില്ല. 33-ാം മിനിറ്റില്‍ തീരസില്‍ ദംഗ്ഡയിലൂടെ തായ്‌ലന്‍ഡ് ഒപ്പമെത്തി. രണ്ടാം പകുതിയില്‍ ഛേത്രിയിലൂടെ ഇന്ത്യ വീണ്ടും ഗോള്‍ നേടി. 68-ാം മിനിറ്റില്‍ അനിരുദ്ധ് ഥാപ്പയും 80-മിനിറ്റില്‍ ജെജെയും ഗോള്‍ നേടിയതോടെ തായ്‌ലന്‍ഡ് പരാജിതരായി.
