ന്യൂഡല്‍ഹി:ശ്രീലങ്കയില്‍ ഇന്ത്യ -പാക് ക്രിക്കറ്റ് പരമ്പര നടത്തുന്ന കാര്യത്തില്‍ തിങ്കളാഴ്ചയ്ക്കുള്ളില്‍ അന്തിമ തീരുമാനമെടുക്കണമെന്നു പാക് ക്രിക്കറ്റ് ബോര്‍ഡ് ബിസിസിഐയോട് ആവശ്യപ്പെട്ടു.
പരമ്പര സംഘടിപ്പിക്കാനുളള സമയം അതിക്രമിച്ചുവെന്നും കുറഞ്ഞ സമയത്തിനുള്ളില്‍ ക്രിക്കറ്റ് മത്സരം നടത്താനുളള സൗകര്യങ്ങള്‍ ഒരുക്കുന്നതു ബുദ്ധിമുട്ടാണെന്നും പാക് ക്രിക്കറ്റ് ബോര്‍ഡ് വ്യക്തമാക്കി.
ഡിസംബര്‍ 15നു തുടങ്ങാന്‍ നിശ്ചയിച്ചിട്ടുളള ക്രിക്കറ്റ് പരന്പരയില്‍ രണ്ട് ട്വന്റി 20 മത്സരങ്ങളും മൂന്ന് ഏകദിനങ്ങളുമാണ് ഉണ്ടാവുക. ഇന്തോ പാക് ക്രിക്കറ്റ് പരമ്പര നടത്താന്‍ അനുമതി നല്‍കണമെന്നാവശ്യപ്പെട്ട് ബിസിസിഐ കേന്ദ്ര ആഭ്യന്തരമന്ത്രാലയത്തിനും വിദേശമന്ത്രാലയത്തിനും കത്ത് നല്‍കിയിരുന്നെങ്കിലും ഇതിന് കേന്ദ്രസര്‍ക്കാര്‍ ഇതുവരെ മറുപടി നല്‍കിയിട്ടില്ല.
