ഒഡീഷ: ഇന്ത്യ തദ്ദേശീയമായി വികസിപ്പിച്ച ഭൂതല-ഭൂതല ബാലിസ്റ്റിക് മിസൈല്‍ അഗ്നി-1 വിജയകരമായി വിക്ഷേപിച്ചു. ഒഡീഷ തീരത്തെ അബ്ദുല്‍ കലാം ദ്വീപിലെ (വീലര്‍ ദ്വീപ്) മൊബൈല്‍ ഇന്‍റട്രേറ്റഡ് ടെസ്റ്റ് റേഞ്ചില്‍ നിന്നാണ് അഗ്നി ഒന്നിന്റെ വിക്ഷേപണം നടത്തിയത്. ആണവ പോര്‍മുന വഹിക്കാന്‍ കഴിയുന്ന മിസൈലാണ് വിക്ഷേപിച്ചത്.
ആര്‍മിയുടെ സ്ട്രാറ്റജിക് ഫോഴ്സ് കമാന്‍ഡ് (എസ്.എഫ്.സി) ആണ് പരിശീലനത്തിന്‍റെ ഭാഗമായി മിസൈൽ പരീക്ഷിച്ചത്. 2016 നവംബര്‍ 22ന് ഡി.ആര്‍.ഡി.ഒ നടത്തിയ അഗ്നി ഒന്നിന്റെ 18-ാമത്‌ പരീക്ഷണം വിജയകരമായിരുന്നു.
കൂടാതെ അഗ്നി-1 (700 കിലോമീറ്റര്‍), അഗ്നി-2 (2000 കിലോമീറ്റര്‍), അഗ്നി-3 (2500 കിലോമീറ്റര്‍), അഗ്നി-4 (2500 കിലോമീറ്റര്‍ മുതല്‍ 3500 കിലോമീറ്റര്‍ വരെ), അഗ്നി-5 (5000 മുതല്‍ 5500 കിലോമീറ്റര്‍ വരെ) എന്നീ പരീക്ഷണങ്ങൾ വിജയകരമായിരുന്നു.
അമേരിക്ക, ബ്രിട്ടണ്‍, റഷ്യ, ചൈന, ഫ്രാന്‍സ് എന്നിവയാണ് ബാലിസ്റ്റിസ് മിസൈലുള്ള മറ്റ് രാജ്യങ്ങള്‍. ജനുവരി 18ന് 5000 കിലോമീറ്റര്‍ ദൂരത്തില്‍ പ്രയോഗിക്കാവുന്ന ആണവവാഹക ഭൂതല-ഭൂതല ബാലിസ്റ്റിക് മിസൈല്‍ അഗ്നി-5 വിജയകരമായി പരീക്ഷിച്ചിട്ടുണ്ട്.
