ഫേസ്ബുക്കിന്റെ മാതൃകമ്പനിയായ മെറ്റയുടെ പരസ്യവരുമാനത്തില്‍ ഈ വര്‍ഷത്തോടെ ഇന്‍സ്റ്റഗ്രാം ഫേസ്ബുക്കിനെ പിന്തള്ളുമെന്ന് റിപ്പോര്‍ട്ട്. വാര്‍ഷിക പരസ്യവരുമാനമായ 50 ബില്യന്‍ ഡോളറില്‍ 52 ശതമാനവും ഇന്‍സ്റ്റഗ്രാമില്‍ നിന്നാവുമെന്നാണ് റിപ്പോര്‍ട്ട്.
യുവ ഉപയോക്താക്കള്‍ ഇന്‍സ്റ്റഗ്രാമിലേക്ക് കൂടുമാറുന്നതാണ് ഫേസ്ബുക്കിന് തിരിച്ചടിയായത്. ഇ-കൊമേഴ്‌സ്, വീഡിയോ പരസ്യങ്ങള്‍ കൂടുതലായി വരുന്നതോടെ യു.എസില്‍ ഇന്‍സ്റ്റഗ്രാമിന്റെ വരുമാനം 2020നെ അപേക്ഷിച്ച്‌ 40 ശതമാനം ഉയര്‍ന്ന് 26 ബില്യന്‍ ഡോളറാവും.
2023 ഓടെ ഇന്‍സ്റ്റഗ്രാമില്‍ നിന്നുള്ള വരുമാനം ഇനിയും ഉയരുമെന്നാണ് റിപ്പോര്‍ട്ട്. 2023ല്‍ മെറ്റയുടെ പരസ്യവരുമാനത്തില്‍ 61 ശതമാനവും ഇന്‍സ്റ്റഗ്രാമില്‍ നിന്നാവും. ഫേസ്ബുക്കില്‍ നിന്നുള്ള വരുമാനം 39 ശതമാനമായി കുറയുമെന്നും ‘ഇ മാര്‍ക്കറ്റര്‍’ പുറത്തുവിട്ട കണക്കുകള്‍ പറയുന്നു.
