ഇന്‍സ്റ്റഗ്രാം തലവന് ആദം മെസേരിക്ക് സ്കാമര്‍മാര്‍ കൊടുത്തത് മുട്ടന്‍ പണി. മൊസേരിയുടെ ഇന്‍സ്റ്റാ അക്കൗണ്ട് തന്നെ കുറച്ച്‌ നേരത്തേക്ക് ലോക്കാക്കാന്‍ വിരുതന്‍മാര്‍ക്ക് സാധിച്ചു. സെപ്തംബറിലായിരുന്നു സംഭവം. ആദം മെസേരിയുടെ പേരില്‍ വ്യാജ ചരമക്കുറിപ്പുണ്ടാക്കി തട്ടിപ്പുകാര്‍ ഇന്‍സ്റ്റഗ്രാമിന് തന്നെ അയച്ചുകൊടുക്കുകയായിരുന്നു.
മൊസേരി മരിച്ചുപോയെന്ന് ബോധ്യപ്പെട്ട ഇന്‍സ്റ്റഗ്രാം അദ്ദേഹത്തിന്‍റെ അക്കൗണ്ട് മരിച്ച യൂസര്‍മാരുടെ അക്കൗണ്ടാക്കി മാറ്റുകയും ചെയ്തു. എന്നാല്‍, ജീവിച്ചിരിക്കുന്ന തങ്ങളുടെ തലവന്‍റെ ഇന്‍സ്റ്റാ അക്കൗണ്ടാണെന്ന് മനസിലായതോടെ പെട്ടന്ന് തന്നെ പുനഃസ്ഥാപിച്ചതായും മെറ്റ വക്താവ് അറിയിച്ചു.
മറ്റ് ഇന്‍റര്‍നെറ്റ് സേവനങ്ങള്‍ പോലെ, പ്ലാറ്റ്ഫോമിലുള്ള സംശയാസ്പദമായ പ്രവര്‍ത്തനം റിപ്പോര്‍ട്ട് ചെയ്യാനും അല്ലെങ്കില്‍ സുഹൃത്തോ കുടുംബാംഗമോ മരിച്ചുവെന്ന് അറിയിക്കുന്നതിനും ഇന്‍സ്റ്റാഗ്രാമില്‍ ഓണ്‍ലൈന്‍ ഫോം സേവനമുണ്ട്, അതാണ് സ്കാമര്‍മാര്‍ ദുരുപയോഗം ചെയ്തത്.
ഇന്‍സ്റ്റാഗ്രാം തലവന്‍റെ അക്കൗണ്ട് വേഗത്തില്‍ പുനഃസ്ഥാപിച്ചെങ്കിലും, ഇതുപോലുള്ള തട്ടിപ്പുകള്‍ നേരിടുന്ന സാധാരണക്കാരായ ഉപയോക്താക്കള്‍ക്ക് അവരുടെ പ്രൊഫൈലുകള്‍ തിരിച്ചുലഭിക്കുന്നത് ദിവസങ്ങളോ ആഴ്ചകളോ എടുക്കാറുണ്ട്. അതേസമയം, ഇന്‍സ്റ്റാഗ്രാം അക്കൗണ്ടുകളെ ഇത്തരത്തില്‍ ലക്ഷ്യമിടാനും നീക്കം ചെയ്യാനും മറ്റും സ്കാമര്‍മാര്‍ 60 ഡോളര്‍ ഈടാക്കുന്നതായി നേരത്തെ റിപ്പോര്‍ട്ടുകള്‍ വന്നിരുന്നു.
