അബുദാബി: ഐപിഎലില്‍ കൊല്‍ക്കത്ത നൈറ്റ് റൈഡേഴ്‌സിനെതിരെ ഡല്‍ഹി ക്യാപിറ്റല്‍സ് ബാറ്റ് ചെയ്യും. ടോസ് നേടിയ കൊല്‍ക്കത്ത ക്യാപ്റ്റന്‍ ഓയിന്‍ മോര്‍ഗന്‍ ഡല്‍ഹിയെ ബാറ്റിംഗിനയക്കുകയായിരുന്നു.
കൊല്‍ക്കത്ത നൈറ്റ് റൈഡേഴ്‌സില്‍ മലയാളി താരം സന്ദീപ് വാര്യര്‍ പ്രസിദ്ധ് കൃഷ്ണയ്ക്ക് പകരം ടീമിലെത്തി. പരുക്കേറ്റ ആന്ദ്രേ റസലിനു പകരം ടിം സൗത്തിയും ടീമില്‍ ഇടം നേടി. ഡല്‍ഹി ക്യാപിറ്റല്‍സില്‍ പരുക്കേറ്റ പൃഥ്വി ഷായ്ക്ക് പകരം സ്റ്റീവ് സ്മിത്ത് കളിക്കും.
പോയിന്റ് പട്ടികയില്‍ നാലാം സ്ഥാനത്തുള്ള കൊല്‍ക്കത്തയും രണ്ടാം സ്ഥാനത്തുള്ള ഡല്‍ഹിയും ഏറ്റുമുട്ടുമ്പോള്‍ ഡല്‍ഹിക്ക് തന്നെയാണ് സാധ്യത കൂടുതല്‍. ഡല്‍ഹിയുടെ ബാറ്റിംഗ് വിഭാഗവും ബൗളിംഗ് വിഭാഗവും ഫോമിലാണ്. എല്ലാ മത്സരത്തിലും ഓരോ മാച്ച് വിന്നര്‍മാര്‍ ഉണ്ടാവുന്നു.
സീസണിലെ ഏറ്റവും മികച്ച ബൗളിംഗ് യൂണിറ്റ് ആണ് ഡല്‍ഹിയുടേത്. ഇതിനൊപ്പം പിടിച്ചുനില്‍ക്കാന്‍ കൊല്‍ക്കത്ത നന്നായി വിയര്‍പ്പൊഴുക്കേണ്ടിവരും. പുതുതായി ഓപ്പണിംഗിലെത്തിയ വെങ്കടേഷ് അയ്യര്‍ പ്രതീക്ഷ നല്‍കുന്നെങ്കിലും നോര്‍ക്കിയയും റബാഡയുമടങ്ങുന്ന പേസ് ആക്രമണം അതിജീവിക്കുമോ എന്നത് കണ്ടറിയേണ്ടതാണ്.
ഇന്ന് ഡല്‍ഹി ജയിച്ചാല്‍ അവര്‍ ഒന്നാം സ്ഥാനത്തെത്തും. കൊല്‍ക്കത്ത വിജയിച്ചാല്‍ നാലാം സ്ഥാനത്ത് അവര്‍ കൂടുതല്‍ കരുത്തോടെ ഇരിപ്പുറപ്പിക്കും.
